Diahuebs mainta e caso di intento y asesinato cu veneno di djaca den orange juice a bin dilanti corte. E caso a wordo trata den su contenido unda cu e sospechoso, un dama hoben di 16 aña di edad, a bin dilanti acusa di asesinato di un persona (su wela) y intento di asesinato di otro dos miembro di famia. Hues a duna indicacion cu riba 23 di november of prome cu esaki e lo tuma su decision riba un caso cu a resulta di bira hopi complica mes. Ta bay haci net un aña cu e caso lamentabel aki a sosode.

Den luna di juni e caso a bin dilanti den corte pro forma tras di portanan cera pa motibo cu e sospechoso ta menor di edad. Diahuebs e caso aki a bini dilanti pa tratamento completo. Di loke a bin dilanti den corte, ta asina cu dia 22 di november e sospechoso a bay Kinppo Foodcenter pa cumpra un orange juice marca HomeMaker cu aparentemente su wela a pidi. E discusion inicialmente tabata ta si e wela mes a gara e glas di orange juice of si esaki a wordo duna na dje.  A bin sali na cla cu ta e sospechoso mes a dun’e y por mira riba imagen di camara di siguridad na e supermercado cu ta e hoben mes a cumpra e juice. Den investigacion di autoridadnan a sali na cla tambe cu un dia prome cu e sucedido, e hoben tabata den e supermercado puntrando pa veneno di djaca y si e por haya esaki den forma di puiro. Ora cu hues a puntra e sospechoso riba esaki, el a nenga di duna comentario.


Varios biaha e hoben a nenga di contesta preguntanan di hues y te hasta a yora un rato ora cu a keda confronta cu algun punto cu a sali den e investigacion. Manera conoci, un señora di edad a bebe e juice aki cu tabata contene veneno di djaca aden, el a bira sumamente malo anto mester a bay cu urgencia Colombia pa tratamento. Otro miembronan di famia tambe a bira malo y mester a bay hospital urgente. Ni algun tempo despues cu e señora tabata na Colombia pa tratamento, el a fayece. Den corte a bin dilanti cu el a sufri di daño celebral severo pero su causa di morto no a bin directamente por medio di veneno.  Mas bien cu el a bira malo anto su salud a bay hopi atras, organonan cu a cuminsa faya, pa motibo di a consumi un tiki di e veneno aki den e orange juice. Den investigacion a bin dilanti tambe cu e veneno no tabata den e orange juice ora cu a cumpra esaki na e supermercado. E juicenan na e supermercado durante e investigacion e tempo ey a wordo controla pa segura esaki.

‘Problemanan na cas’
Investigacion di autoridadnan a saca afo cu a mira tambe algun rastro di e mesun veneno aki den cushina di e cas di e famia. E hoben na prome instante a insisti cu e no ta corda y no sa con e veneno a bin den e juice. Algun rato despues el a keda confronta cu informacion cu a wordo colecta por medio di un grabacion di audio y video cu un amigo di famia a haci anto entrega na polis. Den e grabacion aki por mira y scucha e hoben combersando cu otro dos dama desconoci.  E mucha aparentemente lo mester a haya conseho of sugerencia pa uza veneno di djaca pa haci daño na su wela.  Un trahado di e supermercado y otro hoben cu ta yena saco tambe ta corda cu e sospechoso a drenta e supermercado pa puntra y cumpra e veneno.  Na dado momento hues a bolbe confronta e hoben cu tur e informacion cu a bin dilanti di testigonan y autoridadnan, anto e hoben a opta pa papia. Sin embargo, e hoben a haci un peticion si por fabor prensa lo por sali for di e sala pa asina e informacion aki no wordo publica riba internet of corant. Mescos cu a pidi pa ningun nomber tampoco di ningun persona envolvi keda menciona den publicacionnan ni inicialnan. Na momento cu prensa tabata permiti pa drenta bek e sala, nos redaccion a compronde cu e hoben a papia y admiti di pone ‘un tiki’ di e veneno den e juice.


Fiscal ainda tabata tin dificultad pa compronde e motibo di haci esaki. E hoben a declara cu e tabata wordo agredi door di e wela y señala riba algun of otro problemanan na cas.
E abogado den su defensa mes a subraya cu e hoben a pasa den hopi cos fastioso den su hubentud y no tabata su intencion pa mata e señora. Manera menciona, autopsia haci riba e curpa di e señora cu a fayece a mustra cu e no necesariamente a muri por medio di e veneno, mas bien pasobra el a bira malo y funcionamento di algun di su organonan a cuminsa faya. Fiscal a indica cu si bo purba haci daño na un persona cu por ehempel un substancia manera sucu di puiro, ta imposibel y no ta castigabel pasobra sucu no ta venenoso y no por causa dañonan mortal de inmediato manera veneno.  Pero si ta bay uza un substancia manera veneno di djaca, cual ta uno peligroso pa salud y venenoso, a pesar cu un tiki so wordo uza of no, esaki huridicamente ta un acto castigabel segun fiscal. Segun Ministerio Publico, e sospechoso ta un mucha ainda anto e lo wordo enhuicia segun ‘jeugdrecht’ cu un maximo di dos aña.