Air Canada no ta bay bula pa Aruba por lo pronto. Segun management di e aerolinea, e vuelonan no ta generando ganashi pasobra cantidad di biahero ta cancelando nan vuelonan, y un motibo pa esaki ta e aumento den e cantidad di casonan di Covid riba e isla.
Esaki segun un relato di portal noticiero Aruba.nu.
Segun e datonan mas recien di Departamento di Salubridad Publico (DVG), actualmente Aruba a surpasa e cantidad di 3mil caso activo di coronavirus. Minister di Salubridad Publico y Turismo, Dangui Oduber a expresa preocupacion tocante e situacion, y a haci un yamado na e poblacion pa haci tur den nos poder pa preveni mas infeccion. E ta teme cu un biaha mas turismo ta bay ricibi un golpi fuerte, net ta momento cu e high season ta mustrando un recuperacion casi completo.
Segun Oduber, cu e aumento den cantidad di casonan, tabata cuestion di dia prome cu CDC considera Aruba como codigo cora di riesgo halto den nan conseho di biahe. “Ya nos ta tratando cu algun centenar di cancelacion y e factor di carga di aerolinea a cay di 75 na 60 porciento, loke ta un caida hopi fuerte. Si nos no reduci e cantidad di caso activo, nos temporada peak ta bay ta den peliger serio.”
Actualmente riba website di CDC ta categorisa Aruba como codigo cora light, riesgo halto. E maximo categoria ta cora scur, riesgo hopi halto. E recomendacionnan cu CDC ta duna pa biaheronan Mericano cu lo kier bin Aruba ta inclui pa sigura cu ta completamente vacuna prome cu biaha, y pa esnan no vacuna evita biahe no-esencial na Aruba. “Tuma vacuna ta keda e miho forma pa protege bo mes di malesa severo, reduci e transmision di Covid-19, y reduci e cantidad di variantenan nobo”, e website ta bisa. “CDC ta curasha bo pa tuma un dosis booster di vacuna di Covid-19 si bo ta eligibel.” Ademas ta indica cu pa motibo di e situacion na Aruba, tur biahero por ta den riesgo di contagia y transmiti e variantenan di Covid-19. Ta instrui e biaheronan pa cumpli cu tur recomendacion of rekisito na Aruba, incluyendo bisti tapaboca y tene distancia for di otro.
