Pa añanan largo e mercado di Venezolano tabata uno masha codicia y balora turisticamente riba nos isla. Sinembargo durante e ultimo aña e mercado aki a cay; y Aruba a cuminsa ricibi for di e mercado aki e turista cu e no tabata custumbra di haya for di Venezuela.
Pa algun hendenan e turistanan Venezolano a pasa di esun mas codicia y aprecia pa esun menos atractivo te hasta menosprecia pa motibo di actonan criminal unda ciudadanonan Venezolano tabata envolvi. Sinembargo Oficina di Turismo di Aruba (ATA) ainda ta kere y nan ta wak un futuro den e mercado aki.
“Venezuela ta keda e segundo mercado mas grandi pa Aruba”, directora di ATA, Ronella Tjin Asjoe-Croes ta declara na Bon Dia Aruba.
Directora di ATA ta laga sa cu ora cu nos ta papia di volumen nos tin cu pensa di biaha riba e mercado Mericano cu tin cu genera proporcionalmente mas volumen di bishitante. Sinembargo considerando cu e mercado Venezolano a cay, ATA ta bin introduci diferente esfuersonan pa incrementa e cifra di turista for di otro pais. Un mercado turistico cu ta yudando hopi, sigur despues cu e visa a keda elimina ta Colombia cu a aumenta cu un 40% na 2016.
Otro mercado prometedor na Latino America cu a duna cifra di aumento di turista ta Argentina cu a subi aña pasa, igualmente Chile y diferente mercado di Europa . “Nos ta sigui enfoca riba otro mercadonan. Pero Venezuela ta sigui ta importante”, sra. Tjin Asjoe-Croes a bisa.
El a referi na e patronchi historico di Venezuela, caminda no ta prome biaha cu e pais bisiña aki ta pasa den momentonan di crisis. E ta discuti cu berdad e crisis actual ta mas fuerte cu otronan anterior; pero echo ta cu ATA ta sigui cu actividadnan y presencia di nos producto den e mercado di Venezuela.
E tipo di turista Venezolano cu un presupuesto masha limita di ‘raspa cupo’ cu a bin Aruba pa tin acceso na dollar a cay afo aña pasa. Den su analisis, directora di ATA ta haya cu e mercado ta normalisando. E fluho di turista for di Venezuela ta menos, pero esun cu nos ta bin hayando si tin e modo financiero pa yega y gasta riba nos isla.
Diferente paso a wordo tuma teniendo na cuenta e desaroyo na Venezuela, ya cu e pais aki ta keda un mercado importante pa Aruba. ATA ta consciente cu di otro banda hopi Venezolano a inmigra ya sea pa Miami, Panama, etc.. P’esey nan ta bayendo tras di e Venezolanonan cu ta conoce Aruba y cu tin afinidad cu e destino aki, y cu kisas ta scoge Aruba pa topa cu nan famia di Venezuela.
Nan a inicia strategia pa ATA dirigi nan mes na e Venezolanonan cu ta biba principalmente den e area di sur di Florida. “Esaki ta algo nobo pa Aruba, nos no a hacie anteriormente.” Esaki ta un motibo –segun directora di ATA- cu nan a introduci na januari ultimo e vuelo di Jet Blue, diario nonstop for di Aeropuerto Internacional Fort Lauderdale. E strategia aki ta kier no solamente captura mas bishitante di Merca, pero sabiendo hopi bon cu e vuelo aki ta ideal pa e Venezolanonan cu ta biba den e region di sur di Florida.
