Dia 21 di maart ultimo a wordo declara pa Organisacion di Nacionnan Uni (ONU) como Dia contra Racismo y Xenofobia. Sinembargo e fecha aki a keda practicamente neglisha riba nos isla, a pesar cu regularmente tin incidentenan relaciona cu problema di racismo y xenofobia.
Parlamentario Jennifer Arends-Reyes kende tin origen Latino a laga sa cu no mester desconoci e tipo di problema aki. Un brote di nacionalismo a cuminsa lanta mundialmente y di otro banda tin un cierto grupo cu ta stimula racismo y xenofobia na Aruba.
A pesar cu derecho di igualdad y no discriminacion ta funda den e derechonan humano y consagra den Constitucion di hopi pais manera Aruba, ainda ta existi den hopi parti di mundo odio y practicanan discriminatorio pa rason ya sea di rasa, etnico, religion, nacionalidad, etc..
E parlamentario ta haya cu comunidad di Aruba ta sumamente consciente y madura pa compronde e tipo di problemanan relaciona cu racismo y xenofobia, pero tin grupo ta wordo lanta pa fomenta esaki. Segun Arends-Reyes, bo tin semper y tambe den tur pais mundo, y no solamente Aruba, “gruponan cu ta haci expresionnan cu bo ta bisa cu ta di lamenta”. Aunke nos ta biba na aña 2017, pero asina mes bo por wak cu tin un grupito ainda cu no ta tene na consideracion y tin respet pa otronan nan cultura y nan manera di ta.
Lucha contra racismo y xenofobia
Den entrevista cu Bon Dia Aruba, parlamentario Arends-Reyes ta considera Dia Contra Racismo y Xenofobia como uno sumamente importante. “Nos por a wak cu e tendencia nan global ta cosnan cu ta duna bo miedo. Bo ta wak direccion cu paisnan tambe ta tumando den nan maneho.” E ta haya cu e ambiente politico tambe ta hunga un rol pa fomenta racismo y xenofobia.
“Den tur pais esey ta existi, y naturalmente a nos como parlamentario y como representante di pueblo den general, mester sigui duna e bon ehempel aki di tolerancia y respet pa otronan tambe.”
E ta haya cu Aruba como un pais y un isla chikito, pero cu semper nos sa cu tin hopi reis di diferente pais, particularmente hopi influencia Latino Americano. “Hopi di e personanan aki a bin di hoben y a crece traha na Aruba y hiba e pais aki dilanti, nos por a wak cu e contribucion cu nan a duna ta asina grandi cu awe nos tin un pais den desaroyo.”
E ta considera cu e fecha aki contra racismo y xenofobia ta un ocasion special tambe pa duna tur hende di afo y ciudadanonan cu ta biba na Aruba, no ta importa e rasa, nacionalidad, te hasta e color politico, religion, y e ta yega mas leu. Pero di otro banda e ta considera importante pa tur hende tin cu wak pa ta hopi cuidadoso y respetuoso como ciudadanonan di otro paisnan pa mantene harmonia den e pais unda nan ta biba.
“Respetando cada un nan cultura, pasobra naturalmente ora cu bo ta biba na Aruba, bo ta adopta e cultura cu bo ta biba, cu bo ta crece di Aruba”, segun parlamentario Arends-Reyes. Pero mester tene na cuenta tambe cu nan no por lubida tampoco e rais cu cada ciudadano tin, ya cu e ta un aspecto sumamente importante di cada persona. “Bo no por lubida bo antepasadonan cu tabata prome cu bo. Esaki ta algo sumamente importante pa balora!”.
Asamblea General di Nacionnan Uni a declara dia 21 di maart como Dia Internacional Contra Racismo y Xenofobia. E dia aki ta wordo recorda e Matanza di Sharpeville cu a tuma luga na 1960 contra e manifestantenan cu a protesta contra aplicacion di Apartheid, kendenan a bira victimanan di polis Sur Africano. E meta di e conmemoracion aki ta esun di corda tur ciudadano di mundo cu tur hende mester sigui lucha pa elimina for di nos sociedad e discriminacion racial y xenofobia, ainda presente den e mundo moderno y civilisa di awendia.
