Nos no a keda sorprendi pa e comunicado di gerencia di Refineria di Aruba NV, como propietario di e refineria cu Citgo/Pdvsa tin na lease actualmente. Banda di un splicacion bastante detaya, loke ta bon pasobra esey ta loke hopi biaha tabata falta, tin atrobe un optimismo cu ohala e ta coresponde cu realidad, en todo caso pa esnan cu ta desea di mira e refineria haya un bida nobo, loke sigur no ta henter Aruba.

Tin hasta esnan cu añas atras a desaroya plannan con pa desaroya un San Nicolas, y Aruba, sin un refineria. E tempo aya e iniciativa, di entre otro Camara di Comercio, por a conta cu un furia completo di parti di e prome ministro di e tempo ey, cu consecuencia cu a sigui lidia pa añas largo cu e intentonan pa habri e refineria atrobe.

Pero prome e comunicado di ayera. E compania estatal RdA ta duna un splicacion extenso con e sancionnan di ultimo simannan a afecta e negoshi. Esey sin mas ta berdad, pasobra na e momento aki a bira practicamente imposible pa placa yega Aruba pa continua trabao. Consecuencia ta cu henter e proyecto ta dal para, y un gran parti di e personal cu tabat’ey ainda lo mester bay cas. Nada agradable pa nan, pero no ta algo cu tabata na horizonte solamente durante e ultimo simannan. Ta desde comienso di e proyecto caba na juni 2016 cu tabatin incertidumbre tocante financiamento. E prome pa scapa su curpa ta e compania cu e refinerianan na Merca, esta Citgo Petroleum Corporation, cu a declara un dia despues di e famoso acuerdo cu e dictador Maduro na palacio Miraflores, cu nan no ta responsable pa financiamento di e proyecto, y cu esey lo tabata un asunto externo.

Durante tur e tempo ey, te recientemente, a laga publico na Aruba den e creencia cu ta e Citgo na Merca ey, e miho propiedad cu Pdvsa tin den exterior, cu tres refineria cu capacidad di procesa como 750.000 bari di crudo pa dia, tabata envolvi directamente den e aventura na Aruba. Porfin ayera RdA a bin duna un splicacion di con e structura di e consorcio na Merca ta, algo cu e corant aki, y e Editorial aki specificamente, a duna na varios ocasion, den un intento di duna contrapeso na e informacion hopi parcialisa pa tanto tempo. Nunca ta laat pa reconsidera, en todo caso. Sin embargo, lo ta bon pa continua e transparencia demostra ayera den e tempo nos dilanti, y no cay atrobe den duna informacion limita y no exacto.

Pero pa bolbe na e asunto di e perspectiva negativo cu no ta solamente algo di ultimo simannan, lo siguiente. Ta basta tempo pasa cu tabata ricibi señalnan clave cu cos no tabata anda bon. Por ehemplo, a cuminsa cu masha entusiasmo riba e proyecto di e ‘mancamp’ cu supuestamente mester a bay aloha e mas di mil trahadornan cu mester a bin di exterior. No solamente e trahadornan no a bin, pero Citgo Aruba, y e otro companianan mas halto den e herarkia di e consorcio na Merca, no por a termina e proyecto ey. E contratista hasta a bay corte cu e caso, loke no a resulta fructifero p’e, pero ata e mancamp mita caminda para ta tuma solo. Tambe pa basta tempo caba tin otro indicacion cu henter e structura di Pdvsa tabata den problema. Segun cu e infrastructura di exploracion, explotacion, transporte, refinacion na Venezuela mes tabata biniendo abao, Pdvsa tabata hibando un bataya pa tene cabes riba awa, pasobra a bira sumamente dificil pa atrae capital nobo pa renoba y expande, pasobra bao di presion di e Chavistanan, cu tabata horta gran parti di e ganashinan, sea pa nan mes, sea pa financia henter un structura gubernamental di parasito comunista. Esaki a termina hogando e compania. E ‘default’ riba varios prestamo a haci cu Pdvsa y gobierno di Maduro a cuminsa haya un trato di ‘pacient di lepra’ den e ambito financiero internacional, y no ta cos di aña 2019 so, ta di basta tempo caba.

Sabiendo tur esey, no tabata asina dificil pa deduci cu por lo pronto Pdvsa lo no por a haya financiameto, y talvez ni sikiera lo a duna prioridad na e proyecto na Aruba. Loke nos ta bisando aki ta, cu si e sancionnan di algun siman pasa no a bin, keto bay no ta asina cu proximamente lo tabatin placa disponible pa cuminsa cu e famoso ‘fase 2’ pasobra henter e consorcio di Pdvsa tabatin caba un problema pa haya financiamento pa otro parti mas esencial di nan structura, te pa nan haya pa un proyecto asina problematico manera e refineria di Aruba, cu su estado deplorable di cual nunca nos ta tende RdA ta papia. Cuanto lo ta e gastonan di rehabilitacion awor, despues di practicamente 7 aña cera y exponi na solo y biento? Mil miyon dollar?

E realismo cu mester tin ta cu na Venezuela mes tin mil y un prioridad, aunke naturalmente un cambio di gobierno lo haci financiamento en general hopi mas facil pa Venezuela. Laga nos no ‘jump to conclusions’ pero atende e asunto cu cabes friu, y informacion completo.