Ainda ta falta mas cu 80 mil hende pa conta na Aruba; Presupuesto limita pa mercadeo a afecta censo digital

Ex-directora interino di Central Bureau of Statistics (CBS) y actual miembro di Parlamento, Setty Christiaan-Yarzagaray ta haya cu e falta di un bon promocion a afecta cu no a logra e meta di un 30% di encuesta online di Censo 2020.

Como un persona cu a participa dos biaha y activamente den e realisacion di e dos ultimo censo pasa, e ta sigui di cerca e proceso aki. A base di su experiencia e ta deduci cu no solamente e pandemia ta hungando un rol, pero e hecho cu nos a bay over na un censo digital, tambe tin su impacto. No ta cuestion cu e pueblo no ta prepara, ya cu por mira cu hendenan na Aruba ta haci hopi uso di rednan social, locual e ta refleho cu pueblo ta mas digital bezig riba e tipo di plataforma aki.

Parlamentario Christiaan-Yarzagaray ta kere cu un factor fundamental cu a haci cu e proyecto di censo no a logra su 30% den e parti digital, tabatin mas di haci cu e campaña di mercadeo. Usualmente den un presupuesto di organisacion di un proyecto manera censo, mercadeo of promocion ta hunga un rol hopi grandi.

E por a compronde cu den e fase aki a conta alrededor di 28.800 persona den e periodo di dos siman cu CBS a hacie online. E cifra aki no ta yega net ni e parti di un 30% cu CBS a premira cu lo por yega. E cifra aki ta relata na mas of menos na 10.105 hogar. “Si bo ta sali for di punto di bista cu a conta 110 mil hende den censo 2010, esaki ta duna nos un indicacion cu ainda ta falta mas cu 80 mil hende pa conta na Aruba. E ta un trabao sumamente grandi,” el a bisa.

Pero ya caba nos por a wak e T-shirt oraño di personal di censo riba caya, y e ta kere cu awor no keda nada otro na CBS pa haci e conteo personalmente. Esaki ta tuma luga henter e luna aki, for di 1 te cu 30 di november. Den e siguiente 10 dia, CBS ta bay purba hala mas tanto informacion posibel. Normalmente censo ta wordo organisa di tal forma cu den un siman ta supone cu nan ta haci full e conteo.

E proceso aki regularmente ta sucede den un temporada di vakantie di scol. E temporada herfst vakantie unda hopi maestro ta yuda realisa e proceso aki. Pero aworaki e censo ta tuma luga memey di un temporada cu no ta uno di vakantie y cu hendenan ta na trabou y muchanan tambe ta bayendo scol. “Na final di dia bo mester informacion di tur persona cu ta residencia den cada hogar,” el a laga sa.

Presupuesto

Mercadeo ta un parti hopi significativo den presupuesto di censo 2020. E mercadeo aki ta yuda prepara bo poblacion, ya cu e ta un proyecto cu ta tuma luga cada 10 aña, y hopi no sa di e proceso aki of nan no ta corda di dje.

E problema ta sinta debi cu e presupuesto ta hopi limita debi na e crisis di Covid. Tur cos a cambia y entrada di gobierno a cay substancialmente. E limitacion financiero tin su efecto pa ehecuta e proyecto di censo 2020 cu e presupuesto necesario.

“Ora bo corta riba e parti di mercadeo, e ta afecta bo resultado. Pasobra e informacion no a yega unda e mester yega,” Sra. Christiaan-Yarzagaray a declara na Bon Dia Aruba.

A pesar cu bo por haci uzo di rednan social, pero si bo no tin e extra placa pa inverti y expone e proyecto di censo full pa e hendenan ta mas consciente, entre nan pa colabora y pa nan sa cu tin un conteo. Ya cu a pesar cu e hendenan por sa di censo, pero informacion no ta yega pa participa mas activamente di dje.

Pa colmo e ta haya cu debi cu censo a bay via un sistema digital, tambe tabatin su reto cune. A base di su propio experiencia, el a sinti cu unabes cu bo ta yena e formulario, e prome cos cu e sistema ta puntra bo ta bo number di parcela di awa. “Eynan mi a tranca,” el a bisa. A pesar cu el a haci’e digitalmente, pero e ta haya cu e number aki ta hopi necesario pa yena e formulario, y e ta e prome cos cu tur hende mester sa, esta e number di parcela di awa.

Pues e ta haya cu ta dos cos cu no tin conexion cu otro. Tin hende cu a dicidi di cuminsa yena e encuesta di censo, pero ora cu nan a topa cu informacion riba nan number di parcela, algun di nan cu no a hacie mas digitalmente.

E parlamentario a bisa cu tin hendenan cu el a purba di manda e mensahe pa conscientisa nan y laga nan corda riba e fecha di censo. Pero te hasta algun di nan a reacciona bisando cu nan ta prefera di tin bishita di e teller na cas.

Mayoria di e hendenan aki ta personanan mayor di edad cu ta prefera di haya e bishita di personal di censo den nan cura di cas, teniendo na cuenta e reglanan di DVG di distanciamento social y tambe bistiendo nan tapa boca. Sinembargo e bishita na cas ta costa mas pa CBS cu e ayudo cu bo por a haci’e digitalmente.