For di 2011 e contract cu gobierno di Aruba a firma cu Canadian Bank Note Company tabata hopi na desbentaha di gobierno y desbentaha di deporte. Minister di Deporte, Endy Croes a informa cu gobierno y e compania ta den negociacion ainda y nan a anticipa cu nan lo keda cla mas trempan; pero e ekipo ta na mesa ainda pa por cambia e contract cu Canada.
Croes a expresa cu nan ta espera cu na 2023 mas fondonan por bay na e deportistanan, pero tambe ta bay aloca fondonan adicional pa infrastructura di deporte. “E ta un combinacion di tur y nos tin esaki alinea, finalisando e plan, trahando riba e contract cu Lotto y asina por haya mas fondonan disponibel. Mi ta kere sigur den termino cu nos ta sinta, di cuater pa tres aña ainda, nos lo percura pa tur e cosnan aki ta in place. Y ohala cu ken cu bin despues mantene nan den un vision corecto, pasobra esey tabata falta den añanan pasa den gobierno di e gabinete anterior”, minister Croes a señala.
Tabata na juli di e aña aki cu minister Croes a sigura cu pa luna di october “nos ta bay tin un contract nobo firma cu Canada.” Pero manera por a compronde, esey ta den negociacion ainda. manera el a sigura ayera den su conferencia di prensa.
E tempo aya tambe a menciona cu nan a kere cu nan a sinti cu mester negocia cu Canada pa algo mas concreto cu lo sirbi na final di dia pa deporte y pa deportistanan. Den e negociacion cu e ekipo di Canada cu tabata na Aruba nan a yega na negociacion di un contract nobo, unda nan a firma un acuerdo cu e puntonan mas importante cu ta bay wordo negocia den un plaso di 90 dia, cu a pasa caba.
For di 1999 Fundacion Lotto pa Deporte tabata bende loteria riba papel y mesun aña a cera contract cu e compania Canades pa asina por digitalisa esey den un proceso di innovacion. Di 1999 pa 2010 e compania aki su contract tabata indica cu Lotto pa Deporte a pag’e 8.25% pa e management fee of servicio di tecnologia y e resto ta bay pa premio, comision pa rebendedonan, operacion y e restante tin cu yega pa deporte.
Desde 2011 a percura y a dicidi pa cambia esaki y a duna na Canadian Bank Note Company e operacion completo, segun Croes a sigura, unda ademas di esey aparte di 8.25% a agrega un extra di 15.25%, loke ta nifica cu for di aña 2011 te cu juli 2022 Canadian Bank Note Company no solamente tabata haci tecnologia sino cu tambe tabata opera e Lotto pa Deporte den su totalidad hayando 23.5%.
