Despues di a anuncia un sistema nobo pa registra peticionnan cu ta drenta na e departamento, director di Dimas Kathy Ruiz-Paskel ta conta Bon Dia cu e principio di e sistema nobo ta cu lo bin mas comunicacion electronico cu cliente. Tambe e departamento ta deliberando hunto cu IASA pa wak si e departamnto aki den futuro lo haya e responsabilidad di procesa peticion pa prolongacion di estadia turistico.
Manera nos a publica siman pasa, e departamento encarga cu admision di stranheronan a mira un atraso den procesa peticionnan pa prolongacion di estadia turistico. Sra. Ruiz-Paskel den pasado a admiti cu tabatin caba un retraso relaciona cu e tramite di e prolongacionnan cu normalmente lo tuma 3 dia pa wordo procesa. Esaki relaciona cu problemanan y retonan tecnico cu a bin dilanti despues di a instala e sistema nobo di Sirsa (Sistema Innovativo Registracion di Stranheronan Aruba).
Aunke e departamento a mira retonan pa trata e peticionnan aki sra. Ruiz-Paskel ta priminti cu Dimas lo trata tur peticion cu no a wordo procesa te ainda. “Na momento cu nos bay procesa esaki Inmigracion tambe lo tin acceso na nos sistema. Pues si el a wordo concedi den un bishita futuro e turista no lo tin ningun problema cu esaki, ni ora di sali lo bin complicacion pasobra e ta saliendo.”
Pasa estadia turistico
Si e departamento lo sigui tramita e peticionnan pa estadia turistico, sra. Ruiz-Paskel a splica cu pa algun tempo caba tin combersacionnan tumando luga entre e dos departamentonan unda posiblemente lo bay duna e responsabilidad aki pa IASA. Sinembargo segun e director ainda no tin ningun decision concreto tuma relaciona cu esaki y e departamento lo comunica esaki unabes un decision wordo tuma.
“E minister nobo tambe lo tin cu bay wak unda cua productonan ta fit miho na cua luga.” Esaki lo ta algo cu por tin su luga na Iasa, segun e director, mirando cu ‘ya nan ta haci un tipo di screening pa wak si esunnan cu ta invita persona di afo pa keda na cas tin suficiente entrada’.
Alabes sra. Paskel-Ruiz a splica cu pa personanan invita di afo for di paisnan cu ta rekeri visa pa drenta Aruba, e tipo di peticionnan aki ta wordo trata pa Departamento pa Legislacion y Asuntonan Huridico. Pues ‘bo tin por lo menos 3 instancia cu lo tin cu bay sinta cu otro pa wak unda pa haci e servicio mas eficiente’.
Mester suministra email personal
E director a remarca cu si e peticionario a suministra nan email e departamento lo manda notificacion di e decision na tempo pa nan proximo bishita. Riba e punto aki sra. Paskel-Ruiz a observa cu te ainda no hopi cliente di e departamento ta suministrando nan email personal ora ta bishita Dimas.
“E principio di e sistema nobo aki ta cu nos lo bay comunica mas y mas digitalmente cu e cliente. Pues e ta esencial pa ora bo haci un peticion pa bo tin un coreo electronico di bo mes, no di un consultant ni un tercer partido.”
