E cantidad di hende cu ainda no a paga e number di auto 2017 aparentemente ta grandi. Sinembargo, Servicio di Impuesto Aruba (SIA) no tin un bista ainda riba esunnan cu no a cumpli cu e obligacion aki. Ya cu di otro banda, e cantidad di ciudadano cu a paga via banco tambe ta grandi y ainda nan no a procesa tur e pagonan aki.
Vocero di SIA Mervelyn Romano a declara na Bon Dia Aruba cu normalmente den 5 dia nan ta procesa e pagonan cu ta wordo haci via banco, ya cu nan mester controla prome cu no tin debe atrasa. Pero debi na e situacion cu a surgi cu na ultimo ora nan clientenan a bin masivamente pa realisa nan pago, nan a cay atras cu e proceso aki; y e 5 dianan a bira 10 dia di trabou.
El a aclaria cu si e clientenan a paga ya sea mita aña of full aña 2017 via banco; y SIA den su control interno ta haya cu ainda e cliente aki tin un debe atrasa riba su number di auto; e placa cu el a paga ta bay prome riba e debe atrasa. Ta asina cu ora e cliente cu a paga via banco ta bay busca su sticker di 2017 den e localidad pafo di belastingkantoor na Camacuri, unda antes tabata entrega e plachi di auto lo wordo informa debidamente. Mientras esunnan cu tin nan pago na ordo mester mustra nan papel di seguro di auto na ordo, prome cu nan ta haya e sticker di 2017.
Otro localidad
Ta bon pa tur nan clientenan ta na haltura cu te diamars awor 28 di februari nan ta habri bek den nan oficina principal na Camacuri pa motibo di trabou di construccion cu ta tumando luga actualmente. E siman aki nan ta atendiendo nan clientenan pa haci pago na edificionan di MFA na Noord y Paradera; y tambe den otro oficina auxiliar di gobierno na Santa Cruz, Savaneta y San Nicolas.
Pa e clientenan cu ta bin pa otro servicio cu normalmente SIA ta duna na Camacuri so, awor nan por acudi na MFA Noord of MFA Paradera pa e siman aki.
