Ayera un biaha personal di aduana a dicidi di bay den accion. Esaki ta e di dos biaha den un siman cu nan a dicidi di pone nan trabou abou. E biaha tabata diamars caminda despues di nan accion di varios ora, sindicato di personal di Aduana a manda un carta na minister Angel Bermudez di Financia pa asina pidi un confirmacion por escrito cu ta confirma cu e car rental no ta bin mas pa e lokaalnan cu AAA (Aruba Airport Authority) kier acomoda nan paden.

Edward Maduro kende ta presidente di SADA  a laga sa cu den e carta manda na e mandatario nan a pone un dead line te cu ayera merdia 12or. Pero e contesta cu e confirmacion cu e car rental no lo bin mas pader di aeropuerto no a yega. Pa  tal motibo nan a bin cu e accion aki for di 1or di merdia te cu 4or. Tambe nan a notifica e minister cu e accion aki lo tuma luga pa tres ora si nan no tabata haya su contesta te cu 12or merdia.

Sindicalista Maduro a bisa cu e accion por wordo intensifica den e dianan venidero den caso cu SADA no ta haya un carta di confirmacion di minister Bermudez.  E lider sindical a bisa cu pa 4’or atardi personal di aduana lo bay traha normal, pero e accion lo sigui intensifica for di awe mes, sin den caso nan no ta haya e confirmacion definitivo. Pero di otro banda minister Angel Bermudez a declara na Bon Dia Aruba cu e ta spera cu e partido envolvi lo por reuni entre dialuna y diamars pa logra un solucion.

Malcontento
Tambe el a laga sa cu SADA tin un reunion pendiente cu minister en cuestion encuanto descripcion di funcion (“functieomschrijving” ), despues cu Duana a bira un departamento riba su mes independisa for di departamento di Impuesto. E proposicion cu te cu awor e mandatario a haci no a cay riba bon tera cerca e duaneronan.

Nan ta sinti cu a tuma cierto decisionnan sin tene cuenta cu e vakbond  cu ta representa e mayoria di e trahadonan, ya cu nan ta decisionnan cu ta mara e cuerpo uniforma aki pa futuro.  E echo cu e nomber di e cuerpo di Aduana a wordo cambia –segun presidente di SADA- pa departamento di Aduana sin nan conocemento y tampoco si nan aprobacion, y p’esey a decision aki a cay den mal tera cerca e duaneronan. Esaki ta otro asunto cu SADA lo desea di atende directamente cu minister Bermudez.

Maduro ta haya cu awe cuerpo di Duana ta den un situacion cu nan ta traha di haya un solucion na mesa, pero e ta lamenta cu esaki no ta e caso.