Ainda recomendacion ta cay den escenario 2B: Uzo di mondkapje no ta obligatorio pero si recomendabel

Aunke na principio, DVG no tabata mucho di acuerdo riba uzo di mondkapje, pero awor cu tin casonan nobo y alarmante di contagio local, si DVG ta recomenda uzo di mondkapje como un medida preventivo.

A pesar cu e biaha aki DVG ta recomenda pa bisti’e tur caminda, vooral si bo no por mantene distancia, tog mondkapje su uzo no ta obligatorio general ainda, manera si ta sosode den varios pais tanto di Europa y tambe den nos region. Pero si ayera nochi crisis team a informa cu nan ta exigi uzo di mondkapje den cierto sitionan.

Uzo di mondkapje

Ayera merdia DVG a informa cu despues cu dialuna pasa a keda registra 5 caso positivo di Covid , producto di contacto local, e cantidad di casonan a sigui escala.

Te ayera merdia tabatin 56 caso positivo activo di cual 49 ta debi na transmision local. Mayoria di nan ta personanan bou di 39 aña di edad, kiermen persona cu tin un sistema di bida hopi activo. P’esey e yamado cu ta wordo haci ta entre otro uzo di mondkapje na tur caminda.

Bon Dia Aruba a puntra minister di Salubridad Publico, Dangui Oduber, si no ta miho pa haci su uzo obligatorio y temporal te ora cu e situacion actual lo normalisa. Ya cu e casonan ultimo reporta ta mustra cu e nivel di contagio di un magnitud mas grandi, compara cu e prome cluster cu nos a conoce ora cu e virus a bati nos porta.

E mandatario a bisa cu nan a dicidi di haci’e no obligatorio ainda conforme na e recomendacion cu nan ta haya di e expertonan cu ta conseha gobierno. El a splica cu mondkapje ta bira mandatorio den e escenario tres na momento cu tin contagionan cu ta saliendo for di control na Aruba.

Logicamente nan lo evalua cada momento conforme e escenario presenta, si mondkapje ta bira obligatorio of mandatorio. Si e ta bira obligatorio e task force cu a wordo institui pa gobierno lo controla tur establecimento pa wak si tur hende a sigui e instruccion di gobierno

Igualmente el a declara cu nan ta recomenda fuertemente pa tur hende cuminsa bisti mondkapje of mask den area caminda no por mantene e distanciamento social di 1.5 meter. Nan recomendacion ta cay den e escenario 2B cu ta inclui e uzo di mondkapje fuertemente. Esaki ta e escenario cu nos ta actualmente.

Tambe el a haci un yamado pa comunidad den un forma disciplina cumpli cu tur reglanan di higiena cu nos ta conoce caba pa evita cu gobierno lo mester tuma medidanan severo. Gobierno kier evita pa introduci e lock down y evita tambe limita e mobilisacion di persona pa medio di shelter in place y toque de queda. Nan kier sigui busca e balansa entre salud y economia.

Tambe tur sorto di trabao cu dificilmente por mantene e distancia social aki, entre nan caheronan, dunadonan di cuido, waiternan y trahadonan den sector social, mester haci uzo di mondkapje.

Pero tambe den tur area publico cu ta cera, autoridad di salubridad publico ta recomenda pa bisti mondkapje of tapaboca. Pero tambe den misa, transporte publico, restaurant y tiendanan, kiermen tur establecimento paden.

Igualmente nan ta pidi pa tur persona 60 plus, nan ta recomenda e uzo di e mask. Tambe tur esnan cu ta vulnerabel pa Covid, y cu ta pashentnan cu tin un malesa di base, sea diabetico, cardiovascular, pulmonar, cancer, presion halto, etc.