Aunke e reunion publico pidi pa fraccion di MEP tabata pa trata un biaha mas e topico di criminalidad cu ta afecta nos comunidad; e scandal cu a surgi rond di minister di Labor Paul Croes, no a scapa di e debate cu a tuma luga den parlamento ayera.
E criticanan y cuestionamento a bin mas tanto for di varios miembro di oposicion. Parlamentario independiente Marisol Lopez -Tromp a trece dilanti como un punto di atencion cu aunke e reunion di urgencia tocante criminal ta uno importante; esun cu el a pidi dos siman pasa cu caracter di urgencia pa minister president duna cuenta na parlamento riba asunto di minister Paul Croes, tambe ta uno relevante.
Sra. Lopez -Tromp a critica e echo cu minister president a dicidi di divulga den prensa cu su minister di Labor ta keda non-actief te ora cu e investigacion di Ministerio Publico (OM) riba corupcion y labamento di placa ta bin cla. Mientras cu parlamento como un organo di control di gobierno tabata e prome yama pa haya sa for di e mesun minister president su decision pa pone minister Croes “non-actief” y pone otro minister encarga maneha su cartera. Te ainda e reunion aki no a tuma luga unda e prome mandatario mester rindi cuenta na parlamento rond di e caso cu un miembro di su gabinete ta envolvi, segun sra. Lopez-Tromp.
Consecuencia huridico
E parlamentario ta haya e asunto aki sumamente delicado ya cu e procedura aki lo determina nan trabou y nan respet como parlamentario. Ademas e ta considera cu un decision di e caliber aki lo trece consecuencia huridico cu ne. P’esey sra. Lopez-Tromp a reitera cu e reunion cu Minister Presidente ta importante pa atende e asunto di minister Paul Croes no riba e aspecto personal sino como mandatario di pais Aruba.
Di otro banda, parlamentario di MEP Glenbert Croes a cuestiona e echo cu mientras ta existi un 30% di hoben Arubiano desemplea; e minister di Labor ta wordo investiga entre otro pa duna aprobacion pa mas cu 2 mil trahadonan di afo por haya luz berde pa traha na Aruba. Igualmente su colega den mesun fraccion, Xiomara Maduro a cuestiona e echo cu mientras cu e minister di Labor ta “non-actief”, algo nunca bisto, e mandatario ta sigui cobra su salario sin carga su responsabilidad.
