Manera cu nos a publica algun siman atras, e bendedonan di souvenir y artesania situa patras di edificio bieu di DOW ta preocupa y keto bay wardando pa haya sa ki dia nan lo move oficialmente na e kiosconan nobo dilanti di terminal di crucero. E kiosconan nobo ta basicamente cla desde luna di maart pero ainda falta algun adaptacionnan segun DOW.

Un di e bendedonan di souvenir ta conta Bon Dia cu siman pasa nan a keda yama pa firma contract anto tambe pa bay paga e deposito. E señora ta bisa nos cu tur cos ta yegando na un bon conclusion. “Nan a bisa nos si nos kier nos por pasa mesora, of warda pa januari pa nos move completo ora tur cos ta cla. Tin hende cu kier bay y tin cu ta bisa cu lo warda pasobra mester setup hopi cos eynan. Pa pone cashinan y otro areglonan cu lo tuma mas o menos un luna y wak ki tempo no tin barco pa haci tur e trabaonan aki eynan,” e ta bisa. El a sigui expresa cu nan ta hayando yamada poco poco for di DIP. E siman aki nan a haya papel pa pone coriente y varios hende ta cla pa move caba. “Nos kier pone e coriente prome y depende cuanto tempo Elmar lo tarda cu esaki. Ora ta cla cu esaki nos por wak si nos por bay pasobra ora cu tin barco cu ta bay te laat anochi lo bira dificil ta traha sin coriente. Kedando akinan tanten nos tin delco pa traha y nos por bende,” e señora ta conta nos.

Casi dos aña wardando
Un otro empresario cu su negoshi chikito na e area aki hopi conoci tambe localmente, ta Trudy Lampe. E ta traha cu klei y bende su artenan na turistanan. E ta bisa nos cu en berdad un par di e kiosconan a wordo yama caba pa paga deposito pa move, pero ainda no tin un fecha oficial pa muda. “Nos ta haya esaki un tiki urgente pasobra aworaki ta temporada di awasero, cu lodo, hopi awa, holo stinki, cual no ta ambiente pa turista y nos ta yegando high season cu lo ta druk. Nos a prefera di lo a move prome cu e temporada ey a yega,” sra. Lampe ta bisa nos. E luganan na e kiosconan nobo ta regla caba pero nan ta djis wardando yamada basicamente pa move y haya yabi. “Nos ta preparando for di maart caba cu nos a tende e luganan nobo ta cla pero ohala nos move awo mas pronto cu ta posibel. Prome cu awasero cuminsa pasobra ya caba nos tabata tin hopi lodo ayera, nos kier move mas lihe cu ta posibel,” segun sra. Lampe.

DOW: ‘Diseñando facilidadnan pa crea sombra na e area’
E area na Oranjestad conoci inicialmente manera ‘Welcome Plaza’ awor lo bira oficialmente ‘Paardenbaai Plaza’, cu kiosconan nobo practicamente cla caba pa varios luna. Durante di e ceremonia/apertura di DOW ora di termina e kiosconan aki, nan a tuma nota cu solo tabata kima bastante fuerte na e area segun director Marlon Croes ta splica Bon Dia. “Y esey ta haci cu bo tin cu pone facilidadnan pa tin sombra pa e bira mas atractivo. Pa e trahadonan y bishitantenan di e plaza. A base di esey nos departamento ta trahando un diseño pa wak con por mehora e ambiente por medio di pone facilidadnan cu ta crea sombra den e area,” sr. Croes a splica. Esey ta e parti tecnico. Awor e uzo di e kiosconan mes: “Nos a duna nos input di e huurcontract pa e kiosconan na DIP y nan lo tin cu haci nan parti di otorga e contractnan cu esunnan potencialmente pa bay renta. Esey ta cay fuera di DOW su trabao,” sr. Croes a bisa. E tereno actual unda cu e kiosconan aki ta patras di edificio bieu di DOW, ta un parcela erfpacht cual lo bay keda un espacio liber segun Croes.