Na Aruba ta existi un problema masha grandi mes cu bestianan. Ultimamente comunidad por ripara cu a crea varios campaña di sterilisacion y fundacionnan defensor di animal ta dunando nan 100% pa por cuida esunnan mas vulnerabel, cu algun persona a laga riba caya sin hogar.
E situacion di bestianan riba caya ta un problema di tur hende. Bestianan tambe ta un ser bibo cu ta sinti, si un persona tin un di nan na cas, mester cumpli cu nan obligacion di cuida nan y duna loke nan mester, por ehempel, cuminda, awa, un luga adecua pa biba y esun mas importante, sterilisa y mantene nan sigur paden di cura di cas.
Bon Dia Aruba a tene un entrevista cu Eva Herry di Aruba Animal Shelter y el a splica cu e problemanan di bestia riba caya mester di un solucion cu ni un hende tin ainda. Ta existi hopi hende cu ta culpa gobierno pa via di ‘Kill cage’ pero e hendenan mes no a ripara cu tambe ta un problema social, cu mester tin hopi atencion pa e pushinan of cachonan riba caya cu no tin un hogar pa biba.
Tocante e kill cage, el a bisa cu ainda e ta habri, tur dia un pick up ta hiba bestianan como pushi of cacho, ta existi cu e mesun hende ta hiba e bestia eynan pa motibo cu nan no por tin’e mas. Fundacion como Crijojo Trappers a expresa cu nan ta contra esaki, y mester haya un solucion mas pronto posibel.
Herry a manifesta cu ora e personanan no por tin e bestia mas, nan ta lag’e dilanti di e shelter, ‘nan no ta pensa loke nan ta haci’.
Tambe, Herry a comenta cu ta existi hende cu no kier sterilisa nan bestia pa motibo cu nan mester sigui cu nan naturalesa, pero segun el a sigura ‘e hende ta haya hopi nice pa haya pushinan of puppies, pero ora nan tin 10 di nan e hende ta bisa nos no por cu tur y nos kier trece pa e shelter’.
Den Aruba Animal Shelter tin capacidad pa 16 cacho grandi, pero awor nan tin 23. Tocante e pushi tin casi e mesun cantidad, cu manera e mes a expresa, ‘nos no tin mas luga pa nan’.
Di mesun manera, el a señala cu a crea e campaña ‘Stima mi Sterilisa mi’ cu e obhetivo principal di reduci e cantidad di cacho y pushi, enfoca riba e responsabilidad di cada doño riba mantencion y cuido di cacho y pushi.
E programa ta pa yuda e fundacionnan y doñonan di cacho y pushi rescata pa paga un gran parti di e gasto di sterilisacion pa nan. Tur veterinario na Aruba ta participa den e programa aki, e personanan interesa por subi e webpage www.stimamisterilisami.com y asina por registra y haya un cita cu dokternan veterinario pa haci e operacion.
Prome Minister di Aruba a reacciona riba e problema aki varios dia pasa y el a bisa cu nan lo bay elimina e ‘Kill Cage’ pa haci un Dog Act Shelter, pa via di e problema di bestianan riba caya y e forma inhumano cu ta mata cachonan; algo cu riba nivel internacional, e isla a keda cu publicidad negativo.
Potretnan di referencia di articulo aki a ser tuma paden di e ‘Kill Cage’ ora eynan a haya 6 pushi chikito y dos grandi, cu despues a ser rescata y hiba pa Animal Shelter Aruba.
