Vocero suplente di Cuerpo policial di Aruba Sra. Liliana Rasmijn a bisa Bon Dia Aruba cu nan ta haci nan esfuerso, sinembargo cu ta keda na cada persona pa busca nan auto. Basta biaha cuerpo policial ta avisa e personanan aki cu tin auto den cura. Asina e ta keda e problema cu hende no ta busca nan auto, y polis mester wak kico pa haci cu nan, pa traha luga pa otro autonan cu wordo confisca.
Den pasado na diferente ocasion polis a anuncia den prensa pa automobilistanan busca nan auto, sinembargo ta ripara cu personanan no ta reacciona riba e yamada aki.
Den e siman aki a presenta un situacion unda cu un auto sin seguro a ocasiona un accidente. Normalmente e auto aki lo a wordo hiba warda pa evita cu e ta sigui core sin seguro. Den e caso aki esaki no a tuma luga como cu e garashi di polis ta yen. A puntra Sra. Rasmijn pa confirmacion di e situacion aki, pues cu berdad tur cura ta yen, sinembargo no a haya contesta riba esaki. El a bisa si, cu ainda no a cuminsa machica e autonan pa deshaci di nan y crea luga.
Historia bieu
Na februari 2015 por corda cu Minister encarga cu Husticia Sr. Arthur Dowers a informa cu lo bende vehiculonan tuma den confiscacion si doñonan no busca nan. Na e ocasion aki el a splica di lo tuma e medida drastico aki debi na varios yamada cu el a haci na e doñonan di auto pa busca esakinan sin resultado. Ley ta duna gobierno e poder pa bende of destrui e autonan aki despues di algun siman cu el a wordo tuma den confiscacion, segun e mandatario. Por tin diferente motibo cu hendenan no ta busca nan auto mas. Tin caso cu e vehiculo ta bieu y nan no tin interes pa busca esaki, pero tin casonan tambe cu e boet y acumulacion di gasto cu ta encera documentonan pa e auto ta legal ta costa mucho hopi (kisas mas cu e balor di e auto)ta asina caro pa nan. Na e ocasion aki pues a pidi pa busca e vehiculo sino ta bende of ta destrui e.
Un luna despues berdad a cuminsa deshaci di e autonan aki cu na algun ocasion a constata autonan 5 aña para den e cura di polis. E tempo ey a cuminsa destrui e autonan cu añanan mas bieu y cu un suma di boet hopi halto. E echo cu personanan ta lag’e e auto para den e cura di polis ta crea gasto pa gobierno y ta stroba trabou optimal di polis. Prome cu a opta pa destrui auto, a pensa riba bende piesa di auto, sinembargo a haci calculacion cu a indica cu e entrada di e piesanan lo ta menos cu e esfuerso pa saca e piesanan. Sr. Dowers a bisa cu den futuro lo regla algo cu e doño mester busca su auto den tanto tempo sino lo bende e auto unabes cu gastonan cuminsa subi, pasobra gobierno no por para responsabel pa propiedad di hende, mientras cu nan mes no ta para responsabel pe. Imagen ta ilustra e inspeccion di e mandatario mas cu un aña pasa.
