Ainda no tin gobierno nobo: Proceso di screening a tarda mas di loke a spera

Ayera mainta, formadornan Gerlien Croes y Mike Eman a reuni cu Gobernador di Aruba SE Alfonso Boekhoudt. Expectativa tabata halto pa anuncio di un gabinete nobo, pero esaki no tabata e caso mirando cu ainda e proceso di screening no a keda cla.

Lider di partido Futuro, Gerlien Croes, a splica den su declaracion na prensa na salida di e reunion cu nan a entrega e prome concepto di e acuerdo di gobernacion y e verslag di tur e rondanan di consulta cu nan a hiba te cu awor. El aindica cu ainda falta algun ronda y esey lo den e documento final.

Na mesun momento el a comparti cu ainda nan ta en espera di e resto di e procedura di screening, cu el a remarca ta fuera di nan man como formador. El a remarca cu ta spera cu e siman aki ainda nan por ricibi e ultimo documentonan y den fin di siman nan lo ta haciendo trabounan preparatorio pa cuminsa sinta cu e candidatonan pa minister.

A pesar di e expectativa pa haya sa ken lo forma parti di e gabinete, e formadornan no a duna nomber di candidato y a indica cu lo comparti esaki ora cu e proceso finalisa.

Loke Croes a subraya si ta cu pa nan como formadornan y pa tur departamento encarga, e proceso a resulta di ta un ehercicio nobo y largo, un ehercicio cu un ley cu a ser aproba na 2021, pero ta spera cu ta siña di dje. “Ta bay tin hopi mas gobierno pa forma na Aruba den e añanan binidero y nos mester toch wak kico por siña di e eficiencia di e procedura aki,” el a agrega.

Croes a enfatisa cu e tardansa den e proceso di screening no tin di haber cu nada specifico di un candidato cu por a encontra problema cu e proceso, ta simplemente cu e proceso por lo general ta tardando y ta un proceso hopi rigoroso. Mester tin hopi investigacion, ta investiga miembronan di famia, locual ta echt tuma su tempo. “Si no tabata pa proceso largo aki awe nos lo ta oficialmente ya caba como gabinete nobo,” el a remarca.

El a indica cu esey no ta kita ni pone cu nan a adelanta tur locual cu nan por a adelanta riba dje. El a menciona cu nan a ehecuta e trabou pa tin un documento di locual ta e acuerdo di gobernacion cla, a haci e rondanan di consulta y a entrega e verslag. “Pues e proceso ta canando y nos ta hopi positivo con e proceso a cana te awo,” el a bisa.

Como presidente di parlamento, Croes a splica, cu esaki ta pasa ora tin leynan nobo. El sigui splica hopi biaha loke ta pasa ta cu na momento cu e ley ta den e ehecucion, e ora ey ta siña kico e ley ta nifica en realidad. El a subraya cu personalmente, e ta di opinion cu mester busca un manera pa e ehecucion di e tareanan cu ta ser describi den e ley aki sucede mas eficiente di un otro forma.

Contestando pregunta di miembro di prensa tocante con ta determina e candidatonan pa minister, formador Eman a splica cu e ta consisti di un combinacion di experiencia ,voto y edad. El a indica cu e gabinete lo consisti di un combinacion di persona cu nan ta kere Aruba ta en espera di dje.

“Un gobierno cu por sali pa dilanti, mehora e poder di compra, y e prome stap a ser haci caba cu e amienda pa cuminsa yuda esnan di menos recurso di nos pais. Esey ta un liña hopi fiho den e acuerdo di AVP cu Futuro. Y den e parti di innovacion, generacion hoben pa contribui tambe cu pensamentonan cu ta habri frontera y a haya importante tambe pa den gabinete tin e personanan cu e portfolio tambe cu por haci e diferencia aki pa locual ta trata innovacion, rehubenece e direccion di pais Aruba y na mesun momento cu tambe hunto por carga temanan cu tin di haber cu locual bo ta sinti den bo alma y curason cu e pueblo aki tin mester di dje,” el a remarca.

Contestando otro pregunta di miembro di prensa, tocante con ta bay sigura cu ta destina diferente cartera na persona(nan) cu di berdad tin conocemento pa carga e cartera(nan) cu nan ta bay carga, Croes a splica cu pa partido Futuro e personanan cu a ser treci dilanti como candidato potencial pa bira minister ta carga conocemento sea door di trabounan cu nan a haci of conocemento di estudio riba e topiconan cu a ser presenta.

El a informa cu den liñanan grandi partido Futuro ta carga topiconan manera finanzas, economia, relacionnan den reino, educacion y hasta aworaki ta bin back cu un minister di hoben.

Di parti di AVP, Eman a splica cu e conocemento logicamente ta hopi importante y cardinal pa e escogencia. El a indica cu e candidatonan cu partido AVP tin, cada un tin nan conocemento y nan contribucion. El a agrega cu banda di conocemento, nan a busca tambe e refleho cu ta duna comunidad e sentido cu locual comunidad ta desea lo ser realisa.

Relaciona cu e topico di relacionnan den reino, specificamente e acuerdo cu Hulanda di e Rijkswet y e deadline di dia 1 di mei, miembro di prensa a puntra Croes si lo pidi Hulanda pa extende e fecha di 1 di mei, of kico ta e plannan di Futuro hunto cu AVP mirando cu e gabinete ta bay sinta net den e proceso ey.

Croes a splica cu como formador nan ta hopi pendiente di e desaroyonan na e momento aki pa loke ta e negociacionnan aki. El a indica cu durante e proceso ultimo lunanan tabatin un rapport di IMF cu mester a keda cla pa delinea y duna conseho riba normanan pa por sigui dialogo riba normanan cu lo kier stipula den e Rijkswet aki.

El a sigura cu nan ta teniendo cuenta cu e fecha y e proceso cu ta canando. El a remarca cu na e momentonan aki nan ta den un situacion peculiar pasobra tin cierto combersacionnan ta tumando luga mientras cu nan ta den e proceso di ta probablemente e gabinete cu lo bay haci su entrada pronto den e simannan binidero.

“Locual nos por haci cu ta den nos mas ta purba di monitorea y tin e contactonan necesario pa nos logra yega cu Hulanda na un acuerdo cu no ta bay faya ni Aruba ni Hulanda pa locual ta palabra caba cu fecha,” el a señala.