Mientras cu merecidamente e caso di cacho Khaleesi recientemente a hala hopi atencion, otro caso di maltrato cu a resulta den morto di un cacho, yama Snowy, a keda completamente den silencio.
Comienso di luna, a traves di su pagina di Facebook, minister Ursell Arends a publica tocante un caso di maltrato di cacho unda lamentablemente e cacho no a logra sobrevivi.
“Un otro caso tristo di negligencia y maltrato di mascota. Ayera nochi minister Arends a wordo contacta pa un caso hopi tristo den a bario di Kurimiauw. Presente na e sitio a bin encontra un mascota cu lamentablemente no a wordo ofreci e empatia y amor cu e merece. Bisiñanan a hiba e cacho veterinario mesora pero nos a cab’i ricibi e mal noticia cu e no a logra sobrevivi. Nos tin cu para hunto como comunidad contra abuso di animal!” e publicacion a indica.
E publicacion a ricibi diferente comentario y reaccion di usuarionan cu ta puntra te ki dia mester warda, cuanto caso di maltrato mas mester sucede pa por bin un cambio real den e ley pa duna castigo na e abusadornan. Entre nan, un usuario cu a duna mas contexto di e sucedido. El a conta cu e persona cu tabata duna e cacho en cuestion cuminda a reporta esaki den un grupo di accion di bario, unda a haya basta reaccion di hende y diferente fundacion pa purba yuda e cacho. Segun e persona, a yama polis, pero despues di “oras polis a bin y papia cu e doño of unda cu e cacho lo tabata biba, y a logra hiba e cacho veterinario.”
Informacion cu a circula riba rednan social a indica cu e supuesto doño a hasta stroba e bisiñanan di yuda e cacho aki, pa cual motibo mester a involucra autoridadnan.
Informacion cu Bon Dia Aruba a ricibi ta indica cu e bisiña cu na final a logra hiba Snowy veterinario despues di a ricibi menasa, a papia cu polis di bario pa haya un update. Nan a indica cu na momento di e suceso, ya cu tabata bezig purbando di haya ayudo pa e cacho, no a atende e doño inmediatamente na momento di e suceso. Ta posibel cu por a duna un boet of otro medida contra e doño, pero ta keda na e dos agente cu a atende e yamada e dia ey si nan kier haci esaki.
Mientras tanto, a bira conoci cu e cacho den e caso aki tabata un Husky blanco yama “Snowy.” Segun a informa Bon Dia Aruba, e doño ta un señora di inicial D.M.K.
Bon Dia Aruba a tuma contacto cu Ministerio Publico,pero nan a indica cu ainda no tabatin informacion riba e caso aki. Igualmente, a puntra vocero di polis, Liliana Rasmijn pa confirma e identidad di e doño di e cacho, si tin proces verbaal traha di e suceso y si ta bay presenta acusacion formal den e caso aki. Sinembargo, no a ricibi ningun contesta.
Casonan di abuso di animal ta birando abrumante y ta un mancha scur riba reputacion di Aruba, tanto pa comunidad local como pa nos bishitantenan. Na e momento aki, ta di suma importancia y crucial pa autoridadnan tuma accion firme y contundente den e caso di Snowy, como tambe den esun di Khaleesi, pa bin cu consecuencia cu tur peso di ley contra maltrato y negligencia.
