No mester di permiso pa parti sticker, sinembargo ningun actividad politico por stroba trafico. Y esey tabata caso cierto momento na Pos Chikito ayera, ora cu un multitud grandi di simpatisantenan di AVP tabata parti sticker y a pone cu trafico riba caminda principal a para. Polis a manda patruya pa dirigi e trafico y e accion por a sigui.
E accion di sticker no ta limita na AVP. Partido MEP tambe ta parti sticker, mescos cu algun otro partido cu ta bende rifa riba caya tambe.
Locual ta yamativo ta cu a pesar cu MEP y AVP a bisa di lo ta usa material bieu pa core campaña na 2021, toch a tuma nota di hopi bandera nobo y e stickernan tambe. Dangui Oduber ademas a parti un estilo di revista ‘glossy’ na varios buzon na cas. E observacionnan na Bon Dia Aruba ta cu a kere cu e actividadnan di campaña lo tabata mas sobrio mirando cuanto hende ta den problema financiero debi na e crisis economico y cu tin 11 mil famia dependiente di pakete di cuminda.
En todo caso, te ainda polis no a dicidi cua partido lo haya permiso pa core parada of si ta bay duna e permiso. Tanto AVP como MEP a pidi permiso, pero ainda no tin un decision, ta locual a informa Bon Dia Aruba.
