Ainda no tin claridad riba incertidumbre rond di refineria na San Nicolas

A pesar cu te aworaki  Citgo Aruba ta cumpliendo cu e pago di salario y prestacionnan di e trahadonan cu traha directamente cu nan, ta existi un incertidumbre rond e futuro di e refineria. Un incertidumbre cu ainda gobierno mes no por aclaria. Nan ta pendiente di un reunion cu Citgo.

Pero tambe pa honra un peticion di fraccion di oposicion di duna un splicacion tocante e situacion di e refineria dilanti parlamento. Prome minister, Evelyn Wever-Croes(MEP) a yega di expresa na prensa cu  gobierno lo honra e peticion aki.

Presidente di sindicato IOWUA, Boy Anthony a declara na Bon Dia Aruba cu tin un grupo di alrededor di 81 trahadonan cu ta traha directamente cu Citgo y cu nan ta afilia na e sindicato aki. Nan ta hayando nan pago di nan salario na ordo. E ta referi na e trahadonan di e terminal y di e refineria na servicio directo di Citgo Aruba. Sinembargo tin contratistanan cu si ta hayando problema cu nan pago y esaki ta loke ta afecta e cumplimento cu nan trahadonan cu ta traha indirectamente den e refineria.

Recientemente sindicato IOWUA a manda un carta pa gerencia di Citgo pa duna e trahadonan un splicacion di kico ta pasando y cual ta e situacion real riba e futuro di e refineria. E contesta cu nan a haya na nan e-mail ta cu ora nan ta asina leu gerencia di Citgo ta bay informa nan.

Actualmente segun e sindicalista ta wordo papia di un slow down. Pues  e proceso pa re start e refineria  ta bay mas poco poco. Pero locual nan kier sa si e slow down aki ta pa un par di luna so. Pero nan no sa con largo e status aki di slow down ta bay ta.

Mirando e incertidumbre actual rond di e futuro di e refineria, IOWUA a reuni cu mediador di gobierno, y tambe a sinta cu minister di Labor, Glenbert Croes(MEP) pa bin cu un reunion cu refineria di Aruba (RdA) y Citgo pa aclaria e problemanan cu tin.  IOWUA como sindicato kier sa con nan  ta para, ya cu aworaki basicamente ningun hende sa kico ta bay pasa. Nan lo kier sa  si e trabou ta bay sigui pa re start e refineria of e proyecto aki ta bay cay den un receso pa largo tempo.

Diabierna 2 di februari ultimo, IOWUA tabatin pensa di manda otro carta como recordatorio pa tur instancia atende cu e asunto aki. Nan expectativa tabata  cu siman pasa nan por a haya un contesta pa sinta na mesa. E sindicato aki ta kere cu e solucion mester ta na mesa pa sa kico ta kico, ya cu asina aki nan no por defini nada.  Tampoco nan no ta kere cu accion ta bay yuda mucho pa atende debidamente cu e situacion aki. Nan kier ta parti di e solucion hunto cu tur partido, pero a base di transparencia.  Tanten ainda gobierno ta den un situacion di status quo sperando mas informacion di parti di Citgo riba panorama di e refineria.