Ainda no ta conoci si lo tin cambio den BBO

E di dos fase di e reforma fiscal tin di haber cu sistema di impuesto indirecto of BBO; y belasting riba importacion (invoerrechten). Pero prome minister, Evelyn Wever-Croes a laga sa cu e no sa ainda si e fase aki lo trece un ahuste of cambio.

A pesar cu esaki ta prome minister su area di experticio como fiscalista, te ainda e no tin un preferencia riba e diversidad di sistema di belasting indirecto cu ta existi.

E mandatario a bisa cu e proposicion cu lo sali otro aña for di e comision cu ta trahando riba reforma fiscal, por ta cu lo trece cambio of no na nos sistema di belasting indirecto.

E ta habri pa tur sugerencia cu por bin, pa asina scucha di e veld, for di esunnan cu tin cu traha cune, kico nan ta kere cu ta miho. Como experto, e por sugeri pa bin cu e sistema mas sofistica, pero si pais Aruba no ta prepara ainda, of si e ta mucho complica, no tin mester.

Entrante otro luna, gabinete Wever-Croes den nan prome conseho di minister di tur diahuebs, lo cuminsa delibera riba e siguiente fase di e reforma fiscal. E mandatario a indica cu e prome discusion tin di haber: Unda nos ta para awor?.

El a indica cu gobierno anterior a haci studionan pa cambia e sistema di BBO pa un sistema di AVV, cu ta otro sistema. E sistema di AVV ta pone cu bo ta cobra e belasting, no ora bo ta cumpra den tienda manera BBO, sino ora bo ta importa e productonan.

E prome mandatario ta haya cu esaki lo ta un manera cu lo por reemplasa e BBO pa AVV. Otro sistema ta esun cu ta wordo uza na Corsou, conoci como omzetbelasting, y tin otro tipo di sistema mas. E comision cu ta trahando riba cambio y implementacion di e sistema fiscal nobo, nan ta bay analisa tur e sistemanan cu tin.

A base si esey, nan lo evalua cual di nan lo ta e miho pa nos pais. Pero tambe papia cu e diferente socio y gremionan, pa nan mira cual di nan por funciona miho pa Aruba; te ora bin cu un proposicion final.

Sinembargo, manera a keda demostra den e prome trayectorio di e reforma fiscal, ‘transparencia pa nos ta hopi importante’, asina e mandatario a declara. El a priminti cu lo sigui duna informacion al caso tocante e desaroyo di e dos fase di reforma fiscal. Unabes cu nan tin un idea den cual direccion nan ta bay, gobierno lo informa riba bentaha y desbentaha di cada sistema y pakico nan a scoge pa uno specifico.