Recientemente durante tratamento di presupuesto supletorio den Parlamento di Aruba, parlamentario y lider di fraccion RAIZ den parlamento, Misha Raymond, a dirigi algun pregunta na minister di Labor tocante e tema di minimumuurloon (salario minimo pa ora), cual mester a keda introduci 1 di januari 2024, pero no a sucede.

Parlamentario Raymond a resalta cu e no a spera cu e lo mester trece e tema aki dilanti un biaha mas mirando cu a priminti cu dia 1 di januari 2024 esaki lo mester a wordo introduci, pero no a sucede. El a indica cu despues kier a haci un introduccion “simbolico” dia 1 di mei 2024, pero tampoco a tuma luga. Ya caba luna di juni a yega su fin y ainda no a introduci e minimumuurloon.

“Mi ta puntra mi mes cu ki seriedad ta tumando e aspecto di minimumuurloon, kico falta, pakico e ta tardando, e tin prioridad y una bes mas pa ki tempo ta premira cu lo introduci minimumuurloon?” el a cuestiona.

El a remarca cu teniendo na cuenta cada desaroyo cu tin, cual ta afecta e tur ciudadano y e clase trahado, Raymond a resalta cu for di su punto di bista “mester tuma mas serio” con por mehora e situacion di e trahadonan, sobre todo pa e trahadonan cu ta traha mas di e oranan cu ta wordo indica, pero cu no ta ricibi nada extra fin di luna y con nan ta wordo compensa pa esaki.

Minister di Labor, Energia y Integridad, Glenbert Croes, a contesta e preguntanan di e parlamentario y a subraya cu nan ta tuma e tema di introduccion di minimumuurloon “hopi na serio”.

E mandatario a detaya e trayecto cu e ley di minuumuurloon tin te cu aworaki. El a indica cu riba dia 11 di december 2023 e nota tocante e introduccion di un minimumuurloon ta keda cla y su persona ta presenta esaki na Conseho di Minister pa aprobacion.

El a sigui splica cu dia 15 di december 2023 Conseho di Minister ta aproba e propuesta di e introduccion di minimumuurloon. El a agrega cu den e documentacion tin un nota di estado di e comision minimumuurloon tocante cu e fecha di introduccion tabata premira pa 1 di januari 2024 manera cu a compromete cu parlamento y comunidad, pero no por a cumpli cu esaki.

Dia 10 di januari 2024, el a indica, minister di Labor, su persona, ta manda un nota pa Conseho di Minister y na DWJZ cu peticion pa cuminsa cu e trayecto di legislacion di e ley di minimumuurloon.

Riba dia 14 di maart minister di Labor ta pidi conseho na Sociaal Economische Raad (SER). E status riba esaki, minister Croes a informa, ta cu Sociaal Economische Raad a duna un notificacion cu pa mas tarda 2 di juli 2024, cual ta mañan, nan lo ta cla cu nan conseho pa por manda esaki pa DWJZ.

Pa loke ta DWJZ, e mandatario a indica cu e departamento a informa cu nan ta trahando riba e landsverordering minimumuurloon pa algun tempo caba y ta spera cu nan lo finalisa e concepto prome cu recess di parlamento. El a agrega cu esaki den reserva di e conseho di Sociaal Economische Raad cu su posibel consecuencianan pa e concepto y e memorie van toelichting.

Esaki no ta e prome biaha cu parlamentario Raymond ta trece dilanti cerca minister di Labor e tema di minimumuurloon. Na september di 2022 ya caba e parlamentario a dirigi un carta na minister di Labor den cual e ta propone na e minister pa introduci minimumuurloon.

Den su carta inicial e tempo ey, e parlamentario a resalta cu na Aruba e salario minimo ta wordo stipula como un suma pa luna of un suma semanal. Legalmente un siman ‘completo’ di trabou por consisti di 40 pa 45 ora pa siman, locual ta nifica cu un persona cu ta traha 45 ora pa siman por wordo paga mesun suma total di salario minimo, cu esun cu ta traha 40 ora pa siman. E resultado di esaki ta cu esun cu ta traha mas ora, ta cobra menos pa ora.

Den e carta aki parlamentario Raymond ta propone na e mandatario pa cambia e forma cu ta stipula e salario minimo pa un sistema na unda e salario minimo ta basa riba un tarifa pa ora, pues un minimumuurloon.

Den su carta e parlamentario a puntra e minister tambe si e ta comparti e opinion cu salario minimo mester wordo aumenta, considerando e bestaansminimum, inflacion, poder di compra, y pa preveni pago inhusto.

Den luna di december minister Croes a anuncia cu Aruba ta conoce un aumento di salario minimo y esaki a drenta na vigor na principio di e aña aki, esta 1 di januari 2024. E mandatario a anuncia e firmamento di e reglamento ministerial na unda ta indica cu entrante 1 di januari 2024 salario minimo na Aruba ta aumenta na 1.986,20 florin, loke ta ekivalente na 4.9%. El a splica cu salario minimo semanal ta bira 463,25 florin y salario minimo pa esnan cu ta traha como empleado domestico ta bira 926,65 florin of 10,30 florin pa ora.

No ta un secreto cu costo di bida en general a aumenta na Aruba, locual ta afecta un gran mayoria di ciudadanonan cu ta rek nan salario tur luna pa esaki por yega y cubri tur nan necesidadnan. Ta spera cu e introduccion di un minimumuurloon por tin un impacto positivo den e cartera di e clase trahado.