Ainda no a cuminsa reconstrui e localnan cu a kima na Pasadia Briyo di Solo algun siman atras. E siman aki e fundacion a haci un peticion pa e clientenan keda un par di luna mas na e localidadnan alternativo anto a haya aprobacion mesora.

E ultimo lunanan, Stichting Verstandelijk Gehandicapten Aruba (SVGA) a pasa den algun temponan turbulento. Despues di e candela na Pasadia Briyo di Solo algun siman atras,  nan a haya hopi donacion for di comunidad. Seguro tambe a duna e placa caba bek pa e parti di e mueblenan y tur locual tabata paden di e edificio cu a kima. Hunto cu tur e donacion cu nan a haya, esey ta yuda nan hopi pa setup atrobe.

Riba esey, seguro (Guardian Group) a duna nan un bon donacion pa yuda nan extra. Ainda ta den dialogo cu seguro pa e parti di reconstruccion pa wak si lo bay di acuerdo cu ofertanan cu tin riba mesa aworaki. Pues ainda e clientenan cu tabata kedando eynan ta kedando na e localidadnan alternativo tanten. Directora di SVGA, Els van Homelen ta bisa: “Esey ta un tiki fastioso pasobra ainda no tin nada cu ta wordo drecha na e localidadnan kima. E siman aki mi tabata preocupa pasobra nos tabata tin palabracion cu centro di bario Piedra Plat pa e clientenan keda na e localnan alternativo te cu december.” Pues a pidi nan e siman aki si ta oke pa sigui mas largo cu nan, unda cu mesora nan a laga sa cu lo ta dispuesto pa laga e clientenan keda eynan te cu januari/februari. “Esey ta un alivio hopi grandi. Cu por sigui brinda cuido na e clientenan di Briyo di Solo aunke cu e reconstruccion no a cuminsa ainda na nan luga.”

Gradicido cu espacio temporario
E ta otro pa e clientenan como tambe pa e trahadonan pa ta temporalmente un otro caminda cu no ta nan luga original. Trahadonan ta hopi gradicido cu por lo menos nan tin un luga, cu no ta mucho grandi pero toch adecua. Nan tin un espacio pafo cu ta cera y sigur. Tin un baño, tin television y diferente actividad cu nan por haci eynan. Sra.Van Homelen: “Pa temporalmente e ta ok. E ta cerca di nos y nos ta contento cu centro di bario Piedra Plat ta aportando den e manera aki. Nos a haya un bus tambe for di gobierno pa nos por transporta e clientenan cual tambe ta yudando hopi. Asina cada un a aporta un tiki pa e situacion ta manehabel y pa e continuidad di cuido ta sigui.” E directora ta bisa tambe cu e ta kere cu tur mayor mester ta contento cu tin un luga unda cu nan miembro di famia por keda.

Tur siman ta evalua cua cliente ta pas mas miho na cua localidad pasobra tin tres grupo na Briyo di Solo mes, y dos grupo na centro di bario Piedra Plat. Ora un cliente fada na e centro di bario, ta switch bek atrobe pa bay Briyo di Solo. Tur siman tin adaptacionnan pa laga e cos cana mas miho posibel pa tur hende. “E no ta facil. E ta pisa pa e personal y mi ta supone pa cliente tambe toch e ta un cambio pa adapta na dje. Pero e ta bayendo basta bon.” Den e oferta cu nan a haya pa e reconstruccion ta skirbi cu lo dura 65 dia di trabao, pero ainda nan no a cuminsa. E directora ta bisa: “Pues por calcula cu e reconstruccion ta bay dura un par di luna ainda.”