Februari ultimo, Bon Dia Aruba a publica un articulo den cual Adrian Bianchi y Susana Matteo, un pareha di nacionalidad Argentino, a expresa nan malcontento pa e situacion cu nan a haya como inversionista despues cu a bende e proyecto di Acqua Condominiums cual a bira Radisson Blue. Awo, tanto luna despues, e pareha a tuma contacto un biaha mas pa expresa nan decepcion cu nada a keda resolvi.

“Ya ta conoci cu Acqua Condominiums (cu awendia ta operando como Radisson Blu) tabata promociona e benta di unidadnan habitacional den un edificio di vivienda cu e promesa di ta 100% doño, y cu e terminacion di e obra a tuma un tempo exagera pa keda cla, siendo mas cu 10 aña,” e pareha a expresa a traves di un comunicado di prensa. “Pero lo mas alarmante ta cu a cambia completamente e contract di notario sin aviso na e cumpradornan y dunando tur bentaha na e desaroyador, Basiruti C.V. (Acqua Project), ken ta representa pa e bufete De Cuba/Ormel/Noordhuizen.”

Nan ta conta cu un tiki prome cu e cambio di contract “unilateral y prehuicioso”, nan a haci un demanda den corte di Aruba unda ta dicta e entrega cumpliendo cu e contract original, pero no a cumpli cu e entrega. Nan a apela den corte na Corsou, cu a ratifica e entrega cu e contract en cuestion.

Te dia di ayera, 15 di augustus 2023 Acqua no a entrega nan propiedad – den e caso aki un apartamento. Bianchi y Matteo ta conta cu nan prome abogado, di Croes Wever Ruiz, ta bisa cu a pesar cua gana e caso, no por bay contra e deseo di e desaroyador, Basiruti C.V., cu no ta entrega nan propiedad “a menos cu nos firma e addendum extorsivo ey” y na e momento a informa nan cu lo stop di duna servicio na nan.
“Kiermen nos a haci e demanda, nos a gana esaki, nos a gasta un cantidad considerable di placa pagando Croes Wever Ruiz, y Acqua ta haci loke nan kier, no ta cumpli e sentencia di e hues na Aruba ni di e corte na Corsou.”

E ora nan a acudi na e bufete di Dr. Carol Lejuez, kende a informa nan cu ta posible pa haci un embargo pa forsa pa cumpli e orden di entrega, pero confronta cu e situacion aki, e abogadonan di Acqua ta menasa e deurwaardenan cu accionnan legal si nan bay pa realisa e embargo aki, segun Matteo y Bianchi.

“Esey no ta tur, pa bay mas leu, Acqua, ademas di disolve e contract anterior obligando pa firma un addendum pa realisa e entrega di e unidadnan cumpra – mester aclaria cu nos a consulta cu otro notario di Aruba y notario di Hulanda, y tur ta coincidi cu e addendum y e sub-division di tereno cu nan a realisa ta ILEGAL. E subdivision di tereno y areanan comun cu ya nos a paga nan kier expropia gratis for di nos, kitando derechonan adkeri.”

Nan ta agrega cu “e disolucion aki y kadastrale registratie nobo ta oficia pa e notario Chamilla Tromp, kende ta informa tocante e desconformidad di e clientenan pa firma e addendum, y tambe ta debidamente notifica di e sentencia cu e Cortenan a duna y cual Basiruti C.V. no a cumpli; a pesar di esaki, notario Tromp a traha na fabor di Acqua sin tene cuenta cu e derechonan di e cumpradornan y tur e daño cu esaki ta ocasiona na nan.”

E pareha ta bisa cu nan a compronde cu e notarionan na Aruba ta nombra pa Corona y no por sirbi un partido sino cu nan mester ta neutral y imparcial den nan trabao. “Aki ta resulta cu no ta asina.”

Awo Bianchi y Matteo ta puntra nan mes si e actonan realisa aki ta legal? Otro notarionan a bisa cu esaki no ta legal. “Ta legal pa haci un cambio rotundo di contract di forma unilateral contra e entrega di e apartamentonan? Ta etico y legal pa despoha e derechonan adkiri cu firma di contract notaria y paga cash sin ningun compensacion? Ta corecto, legal y moral pa haci a traves di un notario un division nobo di tereno y areanan comun cu ya a cobra, sabiendo cu ta existi cliente cu no ta acepta pa firma e addendum y manera den nos caso tin un sentencia firme sin cumpli?” nan ta puntra.

Ademas, ta puntra tambe si “e kadastrale registratie nobo realisa pa notario Chamilla Tromp por keda na vigor teniendo cuenta cu e condicionnan abnormal aki pa e cumpradornan, tanto esnan cu a firma e addendum ya cu no a haya otro salida, como esnan cu no a firma, of talbes mester anula esaki? Lo tin husticia, of lo continua trapando e inversionistanan cu di bon fe a inverti cu esfuerso y ilusion na Aruba?”

“E conflicto aki ta conoci pa gobierno di Aruba, ken a duna como contesta cu ta trata di un conflicto entre particularnan, pero aki nos tin otro pregunta: E kadastrale registratie no ta pertenece na areanan di gobierno? E licencia y permiso pa hotel, ken ta otorga esakinan? Ken ta verifica y custodia e legalidad di e accionnan aki?”

Finalmente, e pareha ta bisa cu nan a compronde cu e bufete Croes Wever Ruiz, cu ta pertenece na tata di prome minister di Aruba, cu a haci e benta di e tereno na Palm Beach na e doñonan di Acquq Project y di cual un di nan awo ta minister di e actual gobierno, anteriormente tabata abogado di e desaroyadornan, pues cuestionando e imparcialidad di gobierno den e situacion aki.

Manera Bon Dia Aruba a publica na februari, pa e caso di Matteo y Bianchi ta existi e sentencia AUA201901701 cu fecha 07 di october di 2020 y siguientemente tin otro sentencia di fecha 13 di januari di 2021 na unda hues a indica cu di acuerdo na loke e contract ta bisa, e desaroyador tin cu entrega e apartamentonan; sinembargo, na e momento ey, tanto Matteo como Bianchi a haya 5% back y e lunanan a sigui pasa sin cu nan por haya nada mas. Nan a dicidi di bay Corte di Apelacion di acuerdo na e conseho di nan abogado na unda HOF di Corsou a ratifica e sentencia anterior pa nan haya 5% back y nan propiedadnan tal cual manera e contract ta indica.

E disputa awo ta pasobra, segun Matteo y Bianchi ta sigura, kier a obliga nan di firma un extension di e contract (adendum) den cual nan mester a entrega e terenonan rond y cu nan como doñonan solamente por a huur por medio di e hotel Radisson Blu; a cambio Matteo y Bianchi mester a entrega e casa club, pool, di cual tur esey a wordo cobra cu 50% di e balor di e apartamentonan cu nan a paga caba.

Matteo y Bianchi no ta e unico personanan afecta, tin mas o menos 14 persona cu a firma e anexo debi cu nan ta sigura cu nan no a haya un otro opcion. Na februari, Jose Potenza Perez tambe a bin dilanti pa expresa su malcontento cu un situacion similar.

Por lesa mas tocante e situacion cu Acqua Condominiums riba nos website, https://www.bondia.com/?s=acqua.