Despues di tur e turbulencia na nos planta nacional di awa y coriente a bira keto ultimamente. Parce cu a lubida cu nos ta pagando fuel oil na nivel di casi 100 dollar pa bari, mientras cu awe prijs mundial di heavy fuel oil ta hopi mas abao, producto di prijs abao pa crudo cu ta rond di 50 dollar pa bari awor. Tabatin e scandal tocante e tuberia di gas cu mester a pone entre e planta di procesa sushi na Barcadera, unda a bin resulta cu ta WEB a keda encarga cu pago di esaki. E comisario den hunta di supervision cu ta empleado di e compania madre di e planta nobo di procesa sushi, mirando e problema di conflicto di interes cu el a haye aden, a core sali di e puesto aki, y despues silencio…
Nos a scucha varios rumor tocante e problemanan na e planta na Barcadera, cu ta varia di problema tecnico serio te na perdida total di e makinaria, pero tanten e compania mes no ta haya necesario pa bin dilanti y informa Aruba kico ta pasando, nos ta simplemente warda y constata e hecho cu no tin gas cu ta bay pa WEB uza. Naturalmente ta yega un momento cu mester cuminsa haci pregunta encuanto esaki, pasobra ta di supone cu tin un contracto comercial entre WEB y e planta cu mester produci gas, cu mester tin clausula aden pa proteccion di ambos partido. Awor, si WEB mester a inverti den e proyecto aki, lo no ta logico cu un dado momento ta cuminsa reclama e otro partido cu te awe ainda no tin entrega di e producto? Tin termino rasonabel den comercio te ki dia ta warda, y na unda e asunto ta cuminsa bira falta di cumplimento.
E situacion aki ta haci tambe cu por lo pronto WEB ta keda kima heavy fuel oil, un di e combustibel mas contamina cu ta existi. E fuel oil aki ta bin via tuberia for di tereno di e refineria di Valero na San Nicolas. E compania encarga cu entrega di fuel oil ta e compania cu ta percura pa importacion y distribucion na Aruba, cual ta Valero Marketing & Supply Aruba NV. Den e plannan di traspaso di Valero pa Pais Aruba proximamente e idea ta pa bende e compania aki cu un partner den sector comercial pa Afl. 40 miyon. Den presupuesto 2017 e ganga aki lo ta un di e regalonan cu lo percura pa gobierno por cumpli cu e exigencia di no surpasa 0,5% di deficit y ta permiti gobierno gasta mas placa na 2017, sin sikiera considera corta gasto. Pero esey ta otro tema. Loke ta interesante pa sa ta ken ta e partner local aki cu ta bay cumpra e compania di distribucion. Naturalmente ta bon cu gobierno no ta keda cun’e, pasobra nos sa caba kico ta pasa ora gobierno crea empresa estatal: ta pa hinca un monton di amigo bon paga aden.
Pero, un di e hopi rumornan cu tin ta cu e mesun consorcio cu ta doño di e planta fracasa di gas ta e candidato principal pa cumpra e compania cu ta entrega fuel oil na WEB. Aki tambe nos ta aplica e mesun regla: cu rumor ta rumor te dia nan bira berdad o keda rumor. Nos ta sinta warda kico ta bay pasa. Pero tin otro asunto aki cu si mester atende awor. Esey ta e pregunta kico ta e plan final pa entrega na WEB di e combustibel cu nan mester pa e añanan venidero. Pa hopi aña caba e cambio pa uza gas na luga di fuel oil tabata blokia pa e contractonan cu e refineria. Awor cu ta bin un compania distribuidor nobo, cu no necesariamente ta liga na e refineria, e pregunta strategico ta si nos ta move den direccion di elimina fuel oil como combustibel, manera gobierno a proclama un y mil biaha caba. Kico ta sucede si hunto cu e benta di e compania aki gobierno ta cera un deal pa varios aña pa sigui entrega fuel oil, ignorando e transicion cu tur hende cu ta preocupa cu medio ambiente ta spera di gradualmente elimina uzo di fuel oil y substitui esaki pa gas natural y gas procedente di desperdicio?
Specialmente di un gobierno cu a cana gaba tur parti di mundo con berde nan ta, por spera y hasta exigi cu ta bin un claridad riba e asunto aki. Y mientras nos ta kere cu lo ta bon pa e empresa di distribucion bay den man di empresario priva, ta logico cu e contractonan no por bay mara Pais Aruba di tal manera cu nos no por mehora nos ‘carbon footprint’ pasobra ta bin un simpel continuacion di e contractonan di entrega di fuel oil. E compania mester por tin suficiente ganashi importando y bendiendo gasolin, kerosin, diesel y jet fuel pa henter Aruba. No ta necesario pa fuel oil ta parti di e ‘business model’. Ban spera cu sano huicio y transparencia ta parti di negociacion.
