Ainda Museo Arkeologico no a habri pa falta di personal y director

ORANJESTAD – Museo Arkeologico Aruba (MAA) a wordo cera pa mantencion y instalacion di un sistema nobo di airco. Pero awor cu tur cos a wordo drecha, ainda e ta permanece cera!

E biaha aki ta debi na falta di personal. Tampoco no tin un hende na cabes pa maneha e museo. Esaki ta haci cu e mesun minister di cultura, Xiomara Ruiz-Maduro tin un pechi mas cu ta bistiendo como directora di MAA. E ta haya cu e situacion aki no ta bon. Pero nan ta atendiendo cu e retonan aki pa pronto MAA por habri su porta bek, ya cu e ta un berdadero joya y esun mas bunita den Caribe. Pero tambe e ta un atractivo turistico den e area central di Oranjestad.

Ruiz-Maduro a trece dilanti cu Museo Arkeologico Aruba, situa den un edificio monumental tabata un di e proyectonan cu a wordo financia cu Fondo pa Desaroyo Europeo. Esaki tabata e di 9 fondo di un total di 11 fondo otorga. E ultimo a bira recientemente e edificio monumental Maria Convent cu lo keda renoba cu un fondo 13.05 miyon Euro y lo hospeda e facultad nobo SISSTEM di Universidad di Aruba. Esaki ta e facultad cu estudio Bachelor den Ciencia, Ingenieria, Matematica y Master den Sostenibilidad hunto cu programa Post Doctorado, un Centro pa Investigacion riba Sostenibilidad y un Netwerk Caribense di Ciencia, Ingenieria y Matematica.

E mandatario a laga sa cu prome cu nan a sinta como gobierno, e museo aki tabatin 2 aña cera. Nan a traha diligentemente pa drecha e sistema di airco di e museo. Na luna di december ultimo e edificio a keda entrega pa e contratista cu a haci e trabounan. Actualmente ainda e ta cera.

Ruiz-Maduro a bisa cu e reto cu nan tin aworaki cu MAA ta uno di personal. Durante e periodo cu e museo tabata cera y cu nada tabata pasando -e luga tabatin un calor inmenso- a presenta un exodo di personal. Tambe esun cu a fungi ultimo tempo como director no a sigui cu e funcion aki mas.

Nan ta buscando personal pa e parti di e maneho, y ya caba nan ta biniendo cla. Pero pa e parti gubernamental nan ta bahando e gasto di personal, ya cu nan mester cumpli cu e presupuesto. E re apertura di MAA ta trece su retonan y denter di e retonan aki nan ta buscando solucionnan, segun minister di cultura.