Diamars Parlamento a ricibi un rapport caminda gobierno di Aruba ta informa nan ta cerca di un acuerdo final, despues di un proceso di negociacion. Pero e producto final no tabata diferencia mucho di e esun original.

 

No tabatin cambio substancial riba e contenido di e acuerdo final, sino algun cambionan mas bien di forma of cosmetico. Entre nan e entidad cu Hulanda kier institui den un di e dos leynan di Reino (Rijkswet) cu lo ta encarga cu e fiscalisacion di e reforma cu lo bira di ‘Caribische Hervorming Entiteit’ pa ‘Orgaan voor Hervorming en Herstel Aruba.’

 

Parlamentario Rocco Tjon a bisa cu na bispo di e reunion di Conseho di Minister di Reino di mañan, Parlamento di Aruba lo reuni tambe cu prome minister, Evelyn Wever-Croes. Ademas ayera gobierno tabatin un reunion cu gremio empresarial y sindical, y tambe cu e partidonan politico. Eventualmente e reunion entre gobierno y nos organo legislativo ta tuma luga awe, ya cu no tin mas tempo, prome cu decision lo cay na Den Haag mañan. E ta un reunion den cual Parlamento lo por vocifera su pensamento tambe riba e acuerdo aki.

 

A base di e ultimo documento cu Parlamento a ricibi -segun parlamentario Tjon- dificilmente nan por bay di acuerdo cu loke Hulanda a propone riba e landspakket cu ta contene e dos ley di Reino. Aunke e no por papia pa full Parlamento -conforma pa cuater fraccion y un parlamentario independiente- Tjon a referi na e mocion cu unanimamente a aproba rond di asunto aki. Den e mocion aki Parlamento a bisa cu nan no ta bay di acuerdo cu un ley di Reino (Rijkswet).

 

Negociacion y acuerdo final

Den su declaracion a base di pregunta di Bon Dia Aruba, parlamentario Tjon a conclui cu e resultado di e negociacionnan pa motibo di Hulanda, no tabatin niun resultado.

 

El a bisa cu esaki tambe a wordo poni den e rapport cu nan a ricibi for di gobierno. E diferente punto cu Aruba a trece pa dilanti relaciona cu e dos leynan di Reino, ya caba “for di principio, sin cu a bay dialoga riba nan, Hulanda a bisa cu hamas nan lo acepta of bay di acuerdo cune.” Di parti di Hulanda nan no a bin na mesa pa negosha cu un meta habri, segun Tjon.

 

Encuanto cu Hulanda no a bay di acuerdo cu e proposicion pa un ‘voorhangprocedure,’ pa Parlamento mes vocifera su sentimento. Parlamentario Tjon ta kere cu ta importante cu den e casonan aki keda trankil. Ya cu final di dia, cu Covid of sin Covid, pais Aruba ta keda un pais autonomo y nos ta keda un estado di derecho. El a referi cu riba e topico aki varios profesor, entre nan Prof. Gerhard Hoogers y Prof. Frank Kunneman a referi na dje, cu Hulanda hamas por a bin cu e tipo di exigencia aki. Pasobra na final di dia, Parlamento ta e representacion di pueblo y Hulanda no tin derecho pa exigi cu e instancia democratico aki no mag di vocifera ariba nan pensamento y bin cu preguntanan na e organo di Reino, Raad van Staten.

 

Hulanda practicamente no a tene cuenta pa bin cu cambio cu niun di e puntonan cu gobierno di Aruba a trece dilanti. E no ta solamente pa loke ta e contenido. E ta haya cu hopi di esaki tin di haber cu e actitud y loke e parlamentario a yama falta di “transparencia y integridad” di Hulanda.

 

El a bisa cu Hulanda kier mustra pafo como si fuera cu nos tin un organo di Reino, esta Raad van Staten, pero ora cu un pais di Reino di Caribe kier haci uzo di e instancia aki nan ta prohibi, pasobra e unico cu por hacie ta Tweede Kamer. Tanto Corsou como St. Maarten tin e mesun dilema cu Aruba. E ta haya cu cualkier pais of persona cu ta respeta su mes no ta bay di acuerdo cu loke Hulanda ta propone.

 

Si nos bay di acuerdo cu locual nan ta propone, practicamente Hulanta ta bay tin inherencia riba tur cos na Aruba, parlamentario Tjon a bisa. Te hasta riba futuro di nos refineria y otro industria alternativo. Practicamente e ta haya cu nos ta entregando full un futuro di nos pais pa causa di efecto inmediato di un pandemia cu nos lo por sali eventualmente di dje. Ainda faltando apenas un dia pa e decision crucial den Conseho di Minister di Reino, e ta haya cu ta prudente pa analisa tur cos bon.

 

Tambe e ta haya cu con pandemia of sin pandemia, Aruba ta un estado di derecho, unda tin leynan cu mester wordo respeta. P’esey e ta bisa cu nan lo haci uzo oportunidad cu tin riba legislacion y instancia internacional pa mantene e estado di derecho aki pa pais Aruba. Ya caba nan a manda carta na instancia internacional, y di un banda el a bisa sarcasticamente, cu e ta contento cu e proceder di Hulanda pasobra “aworaki internacionalmente nan ta bay wak tambe cu Hulanda hamas tabatin intencion husto…” Pa sali di e impasse aki cu e paisnan Caribense den Reino.

 

E ta reitera cu Hulanda kier mal uza e pandemia aki pa mara nos paisnan na condicionnan cu no tin nada di haber cu nos economia of finanzas publico, entre nan riba tereno di husticia pa nos bay di acuerdo cu e fiansa cu nos mester pa atende nos necesidadnan.

 

“Bo ta mal uza un pandemia pa practicamente reconkista un pais autonomo. Y esey ta simplemente inaceptabel,” segun parlamentario Tjon.