E ley di Ombudsman tin un trayectorio hopi largo. For di aña 2004/ 2005 e tempo ey minister Zulay van Poppel Marquez a bin cu e idea pa bin cu un Ombudsman, pero e ley no a cana e caminda cu e mester a cuminsa cana.

Segun Parlamentario Mervin Wyatt Ras, despues di aña 2011 cu a trata e situacion di abuso di mucha di un meneer di scol den parlamento, den reunion publico sra. Marisol Lopez Tromp y su persona como parlamentario independiente “nos dos a bin cu un mocion pa asina bin cu un Kinder Ombudsman y e tempo ey a haya sosten unanimo den parlamento. Pero na aña 2013 gobierno a cambia, e ora bin cu e iniciativa pa bin cu un bijzonderecommesie Ombudsman pa traha riba e ley. Y e tempo ey Sra. Marisol Lopez Tromp tabata e voorzitter y a cuminsa encamina full e proceso. Na aña 2014 a haci bishita na Curaçao, St. Maarten y Hulanda, unda cu a papia cu e Ombudsman di e paisnan.”

Despues na aña 2015, e comision a entrega e ley oficialmente na Parlamento. E ley tin cu cana un caminda oficial unda cu e mester bay wetgeving y diferente otro caminda pa asina e concepto di ley keda controla. Ombudsman ta bay tin un rol di interveni actua, pero tambe ley di Ombudsman ta hopi importante debi cu e entidad aki no ta bay ta solamente pa nos grandinan, pero tambe pa nos muchanan.

E Defensor di pueblo (Ombudsman / Kinder Ombudsman ) lo ta un persona cu na momento cu drenta un keho e por cuminsa cu un investigacion y por haci bishita y of pidi documentonan na diferente entidad y of un instancia, sea ta gubernamental of companianan Hulandes, fundacionnan, WEB, Setar, etc. Si e ciudadano sinti cu e no ta keda trata manera e mester wordo trata, e ciudadano por bay na Ombudsman y e Ombudsman mester haci e investigacion y intermedia y trata di busca solucion na e problema.

Si dado momento esey no ta e caso, lo mester traha un rapport y cuminsa entama un proceso. “Un Ombudsman ta hopi importante pa nos comunidad debi cu nos ta haya hopi biaha cu den nos comunidad nos ta critica y tin hopi kehonan cu hopi biaha ta bay na radio, facebook ect ect, pero toch e camindanan no ta keda sigui cana manera cu e mester cana pa e persona haya un bon resultado. Ta keda un sentimento cu e persona no ta wordo scucha.”