Aña pasa nos a publica cu DOW a inicia un investigacion interno relaciona cu fraude den nan departamento. Director Marlon Croes ainda no kier duna Bon Dia Aruba informacion riba esaki.

Den luna di april 2017, nos partner den noticia Ret Karibense a publica cu tabata tin un investigacion interno andando na DOW en conexion cu fraude. Un investigacion relaciona cu empleadonan cu ta sospecha di a haci negoshi cu pintamento di mapa di construccion. Algun trahadonan mester a tuma retiro. Pero director di DOW a nenga di divulga mas detaye ni confirma informacion e tempo ey. El a informa nos aña pasa cu e rapport no tabata cla ainda anto cu tanten e lo a keda un ‘feitenonderzoek’ (investigacion di echonan), no por a divulga nada mas.

Nos a bolbe acerca sr. Croes e siman aki pero ainda e ta nenga di duna informacion riba e status di e investigacion aki. “E ta un tema hopi delicado,” e director ta comenta na Bon Dia. Un tercer partido ta esun cu aparentemente ta ocupa cu e investigacion aki. “Por cierto dos siman pasa mi a combersa cu nan, anto nan ta cerca di caba cu esaki. Pero tin mas cosnan cu ta sosode. Tin cu cross reference y rond af cierto cosnan,” sr. Croes ta bisa.

Segun Ministerio Publico, DOW lo tin cu entrega un aangifte pa nan por forma parti di e investigacion. ”Mi ta calcula cu nan ta investigando of miho dicho, ta lagando un compania hacie, pa despues a base di e resultadonan y conclusionnan, dicidi kico nan ta bay haci”, vocero di OM Ann Angela a comenta na Bon Dia aña pasa. Nos a bolbe acudi na Ministerio Publico pa wak si nan mes no lo a tuma accion y inicia of lo por inicia un investigacion independiente riba esaki. “Nos nunca no ta duna informacion tocante investigacionnan. Wak Ibis mes, ta despues cu e tabata tin algun luna andando nos a cuminsa informa publico. DOW lo tin e mesun policy, mi ta asumi”, e vocero di OM ta bisa Bon Dia.

Server nobo 

DOW a cambia un server nobo aña pasa cual segun sr. Croes, ta mas eficiente y confiabel. E no por a confirma si e cambio aki por tabata relaciona cu e investigacion andando, sinembargo e ta bisa: ”Pa redundancy nos ta bay haci un off site backup pues no na DOW mes. Nos ta backup off site pa si algo mester sosode, algo mester bay malo manera un server crash of el a kibra, pa nos por recupera nos data hopi lihe pa ta bek den operacion dentro di 48 ora.”  Documentonan di DOW awo ta wordo warda riba nan server nan anto cada funcion tin nan acceso specifico. Den otro palabra, empleadonan por solamente tin acceso na cierto documentonan a base di nan funcion den e organisacion. Esaki segun sr. Croes ta pa percura pa tin mas siguridad den e maneho di data den e organisacion. “E ta un sistema cu desde 2014 nos a cuminsa cu e pensamento ey anto na 2015 nos a haci basta inversion y basta cambio riba dje anto pa fin di e aña aki, nos mester caba e off site backup.”