Aruba Birdlife Conservation (ABC) Ainda no a reuni cu gobierno riba e ultimo desaroyonan pa locual ta proteccion di e 16 areanan di naturalesa cu lo mester bay bao di Parke Nacional Arikok. Nan a haci peticion pa dos reunion cu te ainda nan no a haya ningun reaccion for di gobierno riba dje.
Pa medio di un comunicado di prensa, ABC ta informa cu nan a haci un peticion pa reuni cu gobierno di Aruba riba 4 di juli 2017 y otro riba 23 di augustus 2017 pa ricibi un update di e status pa proteccion di e 16 areanan. “Te awe, nos peticion no a wordo honra; ABC no a ricibi ningun reaccion.”
11.000 firma pa protege 16 areanan
Manera nos a yega di publica caba, riba 6 di februari 2013, 21 miembro di parlamento di Aruba a vota unanimamente na fabor pa un mocion cu lo protege 16 areanan di naturalesa. E areanan aki lo mester wordo declara como areanan importante di naturalesa cual lo mester wordo incorpora na Parke Nacional Arikok. Segun ABC, e areanan aki tin un importancia grandi localmente como tambe internacionalmente pa locual ta trata bida di parhanan migrante. Na final di 2016, ABC a lansa un peticion cu tabata na direccion di prome minister Mike Eman, Parlamento di Aruba y Gobernador di Aruba pa stop destruccion di areanan di naturalesa importante pa nos pais. Mas cu 11.000 persona a firma e peticion aki. Den februari di 2017, mas cu cuater aña despues di e voto na parlamento pa aproba e mocion, gobierno solamente a percura pa protege 1 area so di e 16 areanan riba e lista.
Bishita di Princes Beatrix
Un luna despues, Princes Beatrix, mama di Rey Willem Alexander, a bishita Aruba unda cu e tabata presente na e ceremonia pa haci Spaans Lagoen parti di Parke. “E ta e mama di proteccion di Parke Nacional. El a expresa su preocupacionnan riba e otro areanan cu falta. El a haci peticion na gobierno di Aruba pa honra e deseonan di Parlamento, como tambe di e 11.000 firma pa protege e areanan aki bao di Parke. Gobierno a priminti na dje cu esey lo wordo haci,” ABC ta comenta. Varios biaha caba prome minister a publicamente anuncia cu e areanan aki lo wordo protegi bao Parke, cual lo tabata e prome paso legislativo cu e lo a tuma den 2017 prome cu eleccion. Riba 20 di september, ABC lo bolbe duna un update riba e status di e 16 areanan. ABC: “Nos ta keda optimista”
