Na e momentonan aki Directie Volksgezondheid, hunto cu casnan di cuido, SABA y otro instancianan ta den proceso pa describi e calidad di cuido cu nos kier pa nos grandinan.

“Nos ta den proceso pa describi un standard di calidad di cuido y tambe e diferente gruponan,” Lenny Geervliet, hefe na departamento di Ouderenzorg Directie Volksgezondheid ta bisa. Te aworaki ta categorisa cuido di nos grandinan den cinco grupo: E ta cuminsa na cuido leve di un hende cu por cana ainda, te na un hende cu ta riba cama y no por haci nada mas riba su mes cual ta haci e cuido mas pisa.

Permiso pa cas di cuido
Segun sra. Geervliet, ora di habri un cas di cuido, e persona ta describi por ehempel cu e por maneha e cuido di categoria 1 te cu 5, anto e ora nan ta haya permiso p’esey. Un bes pa aña nan mester haci un pago di 250 florin pa nan keda cu nan permiso. Tur e puntonan di mehoracion cu mester mehora den e cas di cuido, e departamento di Ouderenzorg ta monitoria. Sra. Geervliet ta bisa: “Den evaluacion nos por haci conseho na minister pa prolonga un permiso of pa no haci esaki.”

Control
E hefe di e departamento ta enfatisa cu nan tin contacto cu tur e casnan di cuido y e control ta semper na evalua y balansa e necesidad den bo comunidad. “Ora cu tin keho na un cas, nos semper ta bay bishita e cas anto si nan ripiti, Inspectie ta e oficina cu por bay haci control y nan ta haya nos kehonan por escrito. Inspectie ta dicidi si nan ta haya ta necesario pa bay controla.”Nos ta monitor tur locual mester wordo haci.”

Ordenansa nacional (ley nobo)
E departamento di Ouderenzorg na Salud Publico ta uno relativamente nobo cual a wordo lanta na aña 2015. Na augustus 2016 a sali na vigor e prome ley cu ta stipula reglanan en cuanto ta casnan di cuido pa nos grandinan. “E grupo di nos grandinan ta creciendo, esaki ta algo mundial. Na Aruba nos no ta forma un excepcion riba esey. E grupo di nos grandinan den nos comunidad tambe ta creciendo hopi lihe.” Na aña 2030, segun Sra. Geervliet, un ariba tur cinco persona na Aruba lo ta un hende ariba 60 aña di edad.

Comunidad mes a ripara segun sra. Geervliet cu e lista pa haya luga na SABA tabata hopi largo y hende no tabata haya luga na tempo. Casnan di anciano tabata lanta manera loco pa via di esaki. Sra. Geervliet: “E calidad di cuido ta varia hopi y no ta tur caminda tabata tin e personal pa cuida tur e personanan cu tabata tin. Y no ta tur ora nan por ofrece e cuido cu mester, pues a sinti necesidad pa regla esey cu e ordenansa nacional (ley nobo) cu nos tin actualmente cu ta stipula exactamente na kico un cas di cuido mester tene su mes.”

Calidad di cuido
E cas di cuido existente, Dienst Ouderenzorg a organisa un trayecto pa nan prepara nan mes pa e ley nobo. E trayecto a encera pa guia nan con pa yega y cumpli cu tur rekisitonan, pa cual nan tabata tin seis luna di tempo. Na februari 2017 cada cas di cuido mester a entrega nan peticion pa permiso. Nan ta den tratamento aworaki. Prome cu bo por haya un permiso segun sra. Geervliet, bo ta haya un control di departamento di higiena, Dienst Technische Inspectie como tambe di Cuerpo di Bombero. E trayecto na februari cu a pasa a cera e trayecto di tur e rekisitonan, pero awo ta sigui cu e trayecto pa e calidad di cuido segun Sra. Geervliet. “Pues bo ta bay mas na e contenido di cuido cu ta wordo duna y ken ta duna cual cuido. Y ken bo por cuida cu e personal cu bo tin den bo servicio. SABA ta desaroyando su mes mas y mas den direccion di un Verpleegtehuis. Eynan e hendenan ta bay unda tin cuido mas profesional cu un cas di cuido lo no por duna por lo pronto.”

Siguridad di hende
Cosnan cu por haci cu bo ta perde bo permiso pa mantene bo cas di cuido ta varia. E ta bay mas riba tereno di siguridad di e hendenan segun sra. Geervliet cu ta splica nos: “Si bo no tin tur cos na ordo pa cu brandveiligheid, un plan di rescate pa un calamidad, plan di maneho,pa e cuido cu bo ta duna bo mester tin cierto y suficiente profesionalnan den servicio. Tur esaki ta wordo controla.”