Pa loke ta encera e operacionnan cu ta tumando luga na Sero Cristal, un comision consistiendo di tur e departamentonan concerni manera Polis, Departamento di Medio Ambiente y DIP a bishita y control e sitio, segun minister Otmar Oduber (POR) encarga cu infrastructura y medio ambiente.

Un rapport a wordo traha conhuntamente unda cu a constata cu un di e deficiencianan cu tabatin ta cu un di e companianan construyendo, tabata falta un hindervergunning (permiso pa haci molester) pa loke ta trata e operacionnan aki. Teniendo na cuenta cu hindervergunning no ta cay bou di responsabilidad di minister di infrastructura y medio Ambiente, pues a manda carta pa colega minister encarga cu husticia Andin Bikker y a delibera riba e contenido di e conseho ricibi di e diferente departamentonan despues di nan bishita, sr. Oduber ta informa den un relato.

Pa motibo cu ta tereno priva (no ta un propiedad di gobierno), ‘ta hopi dificil pa por prohibi un hende di haci actividadnan riba e tereno aki’. E unico manera cu por protesta contra di esaki ta ora cu ta bin na falta di cumplimento cu cierto permisonan, cual ta locual cu ta tumando luga aworaki y pa cual diferente estudio ta wordo haci, e mandatario ta bisa.

“E siman aki a combersa cu colega minister di husticia cu a indica cu na e momentonan aki ta haciendo trabou pa loke ta e hecho cu e compania te ainda no tin hindervergunning. Pa mira con por pone cu nan ta den cumplimento pa e tipo di operacion aki.”

Loke cu a haci ‘como follow up’ despues di e bishita di e departamentonan na Sero Cristal tambe, ta cu a tuma declaracion y entre otro, kehonan di bisiñanan pa consecuentemente wordo inclui den e evaluacion si e companianan ta bin na remarca, pa por ricibi un hindervergunning, sr. Oduber tambe ta enfastisa.

“Ainda falta claridad riba ki permiso a wordo otorga na e compania aki door di e Minister anterior. Unabes cu constata tur e documentacion lo por tuma un decision di si ta duna e espacio pa por aplica pa un hindervergunning. A base di esaki e decision lo por ta tambe cu ta para henter e operacion, te ora cu cana e proceso pa mira si nan por obtene un hindervergunning si of no.”

Habitantenan rabia
Si minister Oduber no ta actua na tempo, habitantenan concerni lo sigui cu pasonan legal. Esaki ya nan a laga sa den e di dos siman di februari. Bon Dia a publica esaki riba 15 di februari. Un grupo a forma Fundacion Conserva Area Cristal. Den un e-mail manda pa prensa 13 di februari nan ta laga sa cu nan ta ‘masha disgusta como cu minister di infrastructura y medio ambiente Otmar Oduber a priminti cu lo haci algo y a instrui e departamentonan concerni pa haci trabou pa investiga e asunto y tuma medidanan’. Esaki pa motibo cu e companianan no tin permiso pa haci e actividadnan. Pero nada a pasa y nan ta mira cu e companianan ta sigui nan operacion.

E fundacion a bisa cu den e caso e departamentonan no ta actua dentro di 14 dia, esta haci control adecua y aplica e ley, nan lo sigui e caminda legal. No ta nan so cu ta rabia, pero tambe habitantenan y otro simpatisantenan, nan ta bisa. “Tin un molester grandi na Marawiel y Babijn y Jaburibari pa salud y no por biba trankilo. Tambe e ta bira hopi dificil pa bende e casnan cerca e cobamento”, asina e fundacion ta bisa.

E dos siman a pasa y e fundacion no a informa si nan a tuma pasonan legal of awor ta warda riba e minister como cu el a indica cu e ta investigando e caso ainda.

Segun e fundacion e biento ta trece stof y gas toxico, entre otro di e planta di asfalt direccion di dos bario di FCCA na Jaburibari, e cas di anciano di Stichting Thuiszorg y Parke Curason. Banda na tur e casnan den e area ey, nan ta bisa. E fundacion tambe ta preocupa cu e medio ambiente.

Den e caso cu e companianan no tin un hindervergunning (permiso pa haci molester), no ta importante si e actividad ta tuma luga riba un tereno di gobierno of priva. Esta cu gobierno por actua como nan ta bay contra e ley di Hinderwet. Asina Bon Dia a mustra hopi biaha caba den noticianan igual.