Ainda departamento Maritimo (Directie ScheepvaartAruba) no tin un bista di e impacto cu e sector maritimo a sufri economicamente a consecuencia di e impasse cu a surgi cu cuerpo di Aduana na waf di Barcadera.
Ayera director di departamento Maritimo, sr. Carlyle De Coteaua declara na Bon Dia Aruba cu na cuminsamento e accion di duana no a afecta e sector aki mucho, te hasta nan no a wordo envolvi den e impasse aki. Te ora cu departamento Maritimo a wordo informa cu un par di boto no por bay afo pa motibo di e accion aki.
Accion y impacto
Sr. De Coteau a bisa cu mesora el a tuma contacto cu director di cuerpo di Duana, ya cu e problema cu a surgi cu Astec no mag di afecta e salida di botonan fei di waf. Den e caso specifico aki, sr. De Coteau a indica cu berdaderamente Duana no tabatin niun autorisacion pa para e boto ey, ya cu e boto tabata haciendo cu fendering.
Otro caso tabatin di haber cu un boto cu mester sali cu cuminda y otro tipo di abastecemento pa e botonan staciona den nos awa teritorial, pero e no por a sali pasobra Duana mester a check e boto prome.
“Nos no sa ainda pasobra ami mes tabata asina ocupa cu henter e situacion aki cu mi no por enfoca mas riba kico el a nifica. Pero te awor nos no a haya niun e-mail di companianan di afo rabia of di kehonan”, el a bisa.
E no sa si e reaccion lo bin despues… P’esey el a yega di bisa cu e operacionnan cu ta cay den man di Astec y APA, nan ta atende tur cos. Pero di otro banda, Duana no mester stroba e operacion di e sector maritimo cu ta tumando pafo riba nos lama teritorial.
“E no ta cay bou Astec ni APA, e ta cay directamente di gobierno”, director di departamento Maritimo di Aruba a declara na Bon Dia Aruba.
Sector maritimo
Gobierno ta hincando hopi esfuerso pa desaroya e sector maritimo como un pilar importante pa nos economia. Sr. De Coteau a informa cu nan ta trahando pa bin cu un estudio padetermina e cifra exacto di contribucion di e sector maritimo pa nos economia.
Pa 2015 nan ta calcula cu e sector maritimo a contribui directo of indirectamente entre 15 pa 20 miyon florin. E no ta kere cu e cifra aki no ta mucho leu di e realidad; y te hasta sr. De Coteau ta kere cu e por ta mas, considerando e cantidad di barco cu a bin tira anker. Tambe cuanto barco a haci uzo di diferente servicio entre nan abastecemento di combustibel na Aruba, botonan cu ta abastece cu cuminda y piesanan e botonan para afo, y otro tipo di operacion te hasta di benta di boto riba nos lama teritorial.
Ademas cada boto para afo mester tin un agencia maritimo na Aruba cu ta representa nan locual ta produci actividad economico riba nos isla. Un proyecto cu a produci 5 miyon dollar ta esun “Perla” den awanan di Venezuela, caminda nan a haci uzo di Aruba como nan home port, el a bisa.
