Te ainda gobierno no a duna mayor claridad kico lo bay bira e destino di BBO (impuesto indirecto). Kier men si BBO lo sigui of si nan ta bay den otro sistema. Te ainda e decision aki no a cay, asina minister di finansa y economia, Xiomara Ruiz-Maduro a laga sa. “Mi tin cu bisa cu e decision eynan no a wordo tuma ainda,” el a bisa.
E mandatario a declara cu nan tin un retraso riba e plan inicial cu gobierno tabatin pa introduci den fasenan su reforma fiscal, cu e diferente adaptacion y/of introduccion di impuestonan nobo. Na juli awor e decision lo bay cay riba futuro di BBO of impuesto indirecto.
Ora gobierno a anuncia cu lo bin cu un reforma fiscal, a informa cu e reforma aki lo wordo introduci den cuater fase. Mester introduci e dos prome parti mester prome cu dia 1 di juli. Actualmente no ta den e prome fase. Pero –segun e mandatario- tin cantidad di trabou cu a wordo acumula cerca un grupo cu ta haci un cantidad di trabou. Esaki ta haci cu tin plan cu mester hala un tiki, debi cu mester duna cierto prioridad na otro cos.
Sugar Tax
Durante e tratamento di presupuesto 2019, un impuesto cu gobierno kier bin cune ta e Sugar tax, cu ta uno cu a crea reaccion di parti di e gremio comercial (KvK). Nan mes no sa con gobierno lo bini cu un regulacion y ponemento di impuesto riba productonan cu ta contene sucu. Camara di Comercio (KvK) ta na altura cu gobierno kier a bin cu un Sugar tax nobo sin consulta cu e partnernan envolvi.
Di su banda, Ruiz-Maduro a bisa cu e trabou riba Sugar tax a wordo haci pa e comision. Pero e decision final riba dje no a wordo tuma. P’esey e informacion aki no a wordo divulga pafo cu e otronan partnernan.
