April ultimo, Bon Dia Aruba a publica un articulo cu e titulo “Ainda no tin desaroyo conoci den caso di maltrato di cacho Snowy;” otro caso di negligencia di bestia cu no a bay mucho viral, pero cu lamentablemente ta refleha e problema di maltrato cu ta existi pa mascotanan di cas.

Recientemente Bon Dia Aruba a haya informacion di e caso aki for di un par di fuente, cual ta bay keda anonimo pa motibonan di seguridad. E personanan aki a splica cu e nomber real di e cacho no tabata “Snowy” pero pa cariño y door cu e tabata un Husky blanco nan a yam’e asina. E tabata un cacho hopi lief cu no tabata ni blaf, su unico problema tabata cu e tabata cana rond di e bario su so, e tabata yega na cierto casnan unda hendenan tabata dun’e cuminda ya cu e tabata mustra un poco flaco.

Na comienso e bisiñanan kier a tum’e y hib’e na un veterinario, pasobra nan a kere cu e cacho no tabatin doño. Tur ora e tabata cana los rond, pero e tabatin su añanan caba y tabata mustra flaco. Nan a ripara cu e tabata bay na un cas y nan a puntra e doño pa tum’e, pero e doño a bisa nan cu no pasobra e cacho tabata malo y tabata den su ultimo dia, kiermen nan a lag’e cana rond, segun e persona a conta.

Un anochi e fuente anonimo a yega cas, habri porta di auto y Snowy tabata para pafo di su cas y tabata sangra basta. Su patanan y su lenga tabata full yen di sanger, y door cu e tabata blanco, esaki a hala atencion di biaha. Nan a preocupa y busca ayudo.

Pero e ayudo pa Snowy no tabata algo facil di haya. E doño aparentemente no tabata na su cas y otro persona cu ta biba eynan a stroba e proceso pa Snowy haya ayudo, cu hasta a menasa esnan cu tabata kier yuda e cacho.

Door di un chat group di e bario riba e aplicacion Whatsapp a dicidi di cuminsa splica kico tabata sucediendo cu Snowy y un di e personanan a cuminsa actua.

Nan tambe a yama Polis di Bario, kende a bisa cu “nos no por haci nada.” Despues di varios yamada dos funcionario a dicidi di tuma e denuncia. Nan tambe a papia cu e doño di e cacho un rato despues, kende a dicidi di bisa “bay cune numa” y e bisiñanan a hiba Snowy na veterinario; pero lamentablemente el a perde e bataya, sin detaye di kico realmente a pasa cune.

Hasta minister di Integridad, Ursell Arends a presenta na e luga den oranan laat di e anochi ey. Ademas el a reacciona riba e caso aki riba su rednan social: “Un otro caso tristo di negligencia y maltrato di mascota. Ayera nochi minister Arends a wordo contacta pa un caso hopi tristo den a bario di Kurimiauw. Presente na e sitio a bin haya un mascota cu lamentablemente no a wordo ofreci e empatia y amor cu e merece. Bisiñanan a hiba e cacho veterinario mesora pero nos a cab’i ricibi e mal noticia cu e no a logra sobrevivi. Nos tin cu para hunto como comunidad contra abuso di animal!” e publicacion a indica.

E denuncia di e caso aki ta den man di dos Polis di Bario. Bon Dia Aruba a purba di haya mas informacion di e caso ayera, si tin proces verbaal traha di e suceso y si ta bay presenta acusacion formal den e caso aki. Sinembargo, no a ricibi ningun contesta te ciere di edicion aki.

E publicacion a ricibi diferente comentario y reaccion di usuarionan cu ta puntra te ki dia mester warda, cuanto caso di maltrato mas mester sucede pa por bin un cambio real den e ley pa duna castigo na e abusadornan.

Bon Dia Aruba tambe a tuma contacto cu Ministerio Publico na april ultimo, pero nan a indica cu ainda no tabatin informacion riba e caso aki.

Sinembargo, un otro caso di maltrato di bestia si a bay viral y hasta a haya atencion di turistanan pero Snowy no a haya e mesun atencion ey, e pregunta ta sigui keda te ki dia a nos como comunidad y como ser humano ta bay permiti cu un bestia, sea cacho, pushi of cualkier otro mester muri pa via di negligencia of maltrato di su mesun doño?

Casonan di abuso di animal ta birando abrumante y ta un mancha scur riba reputacion di Aruba, tanto pa comunidad local como pa nos bishitantenan. Na e momento aki, ta di suma importancia y crucial pa autoridadnan tuma accion firme y contundente den e caso di Snowy, manera a haciele cu esun di e cacho Khaleesi, pa bin cu consecuencia cu tur peso di ley contra maltrato y negligencia.