ORANJESTAD – E aña aki Wit Gele Kruis (WGK) ta participa un biaha den e carrousel di informacion pa scolnan secundario organisa pa FADA den cuadro di temporada di Carnaval. Ainda e cifra di embaraso hubenil ta halto considerando un isla di 110 mil habitante cu Aruba ta. Nan a cera aña 2018 cu 72 mucha cu a haya yiu; y apesar cu e ta un cifra halto, e ta menos compara cu 2017 cu tabata 93 mucha cu a haya yiu.

Monique Giel-Labad di WGK a declara cu ora el a analisa e cifra aki y el a bay bek den e periodo aki ta wordo yama ‘periodo di carnaval baby,’ ainda e cifra ta halto. Den tur e lunanan di henter un aña e lunanan di october y november, ta resulta cu 17 mucha a haya yiu compara cu e otro lunanan anterior.
“Unda tabatin acto sexual iresponsabel cu diferente partner cu nan no sa ken ta e tata di e baby,” el a bisa.

P’esey ora cu nan ta busca e origen of problema cu nan a yega na un embaraso no desea of plania; ta resulta cu mayoria di nan ta den e periodo di carnaval unda cu alcohol y droga a hunga un rol hopi grandi. Pa tal motibo WGK ta haya importante pa nan forma parti di e carrousel di FADA. Nan ta bay atrobe cerca e muchanan di scol secundario. Giel-Labad a bisa cu nan lo pone atencion pa tin interaccion cu e muchanan durante nan charla pa wak con nan ta pensa ariba cierto situacion cu ta presenta na e momento ey. E ta haya cu hopi biaha e ta un situacion penoso. Hopi biaha e ta wak cu ta muchanan cu tabata bou di influencia di droga, pues nan no sa of no ta consciente di tur loke nan a haci. Ta dificil pa despues nan por bisa tocante nan embaraso no plania.

Durante nan charla WGK ta bay mustra e muchanan con un situacion asina por pasa a base di un video cu Giel-Labad ta bay presenta. E video aki ta mustra e bida real di dos hoben unda cu bou di influencia di alcohol, nan no a uza proteccion y e mucha muhe a sali na estado. Pero tambe cu un malesa transmiti sexualmente. Durante su charla e ta duna cierto conseho, dificilmente e por bisa pa nan no bebe ya cu nan ta haci’e tog. Pero alomenos ora cu nan bebe wak bo keda na bo tino y pa bo riba consciente di locual bo ta haci. “Pasobra despues bo ta lamenta y bo no por haci nada mas,” el a bisa.

No solamente WGK ta bay duna informacion pero tambe e ta bay duna splicacion pa nan con e ta ora cu bo ta haya un baby na un edad hopi jong y con nan boda ta cambia radicalmente. Pero tambe con ta para si e baby ta nace cu un defecto fisico of despues durante nan desaroyo pa consecuencia di uzo di droga durante embaraso. Giel-Labad ta expresa cu WGK ta contento cu por uni cu e otro instancianan,manera Telefon pa Hubentud, departamento di Duana, DBZ y FADA pasobra nan tur ta traha hunto riba e mesun problema aki.