Un siman a transcuri caba cu Ahata pa medio di un carta na gerencia di ATA a dicidi di retira su tres miembronan for di hunta directiva di e organismo aki, sin expresa e motibo di esaki. A pesar di esfuersonan cu a wordo haci, ainda e situacion aki ta sigui status quo.
Esfuersonan ta wordo haci pa Ahata reconsidera su posicion y pa asina nan manda nan candidatonan pa yena e vacaturanan aki. Ayera directora di ATA, Ronella Tjin Asjoe-Croes a declara na Bon Dia Aruba cu den un siman dos carta di parti di minister di Turismo a wordo manda pa Ahata.
Cartanan
E prome carta a wordo manda diahuebs siman pasa, caminda minister a pidi Ahata pa manda dos candidato pa cada asiento cu nan tin den seno di e hunta directiva di ATA. “Esaki ta conforme ley di ATA. Y conforme e ley, ta minister ta haci esaki”, asina e ehecutivo di turismo a bisa na e matutino aki.
Tjin Asjoe-Croes a laga sa cu diasabra ultimo a drenta un carta di abogado di Ahata, caminda nan a informa cu nan lo duna un contesta pronto na e solicitud cu e mandatario di turismo a expresa den su prome carta. Sinembargo e dianan a transcuri y nan no a tende nada mas, segun directora di ATA.
Diamars ultimo, minister di Turismo a bolbe manda un carta pa Ahata. Den e di dos carta aki, e mandatario a subraya e importancia di e miembresia di Ahata den e hunta di supervision di ATA, como partner den industria di turismo. E miembresia aki ta forma parti di e fundeshi a base di cual ATA a wordo crea, asina Tjin Asjoe-Croes a declara.
“E ta forma parti integral di e cooperacion di ATA o sea di e relacion di partner den forma di por tin Ahata cu tres asiento den directiva”, directora di ATA a indica.
Den e di dos carta e mandatario di Turismo tabata reiterativo riba su solicitud na Ahata, den spera cu e por haya pronto e nominadonan pa cada un di e tres asiento cu nan tin den e hunta di supervision di ATA. Ayera te ora di merdia no a wordo tendi nada mas riba e dos solicitud cu e mandatario a haci na Ahata riba e asunto aki.
Hunta supervision
E hunta di supervision di ATA ta consisti di 7 miembro: 3 di gobierno, 3 di Ahata y 1 presidente eligi entre nan mes. E presidente actual di e hunta di supervision di ATA ta sr. Jossy Lacle kende tambe a yega di expresa su opinion riba e asunto aki y su deseo pa e situacion presenta lo wordo normalisa bek. Pero te ayera y prome cu e articulo aki a wordo skirbi, Ahata no a manda su candidatonan pa minister di Turismo.
Mirando importancia di turismo, e brug entre ATA y Ahata no ta full kibra. Gerencia di ATA tin contacto cu Ahata ariba otro diferente tereno a base diario pero nada mas den bienestar general di nos turismo.
