(AP) – Imagina’bo un centro di costumer0service cu ta papia bo idioma, sin importa cua e ta.
Alorica, un compania na Irvine, California, cu ta maneha centronan customer-service rond di mundo, a introduci un herment di traduccion cu inteligencia artificial cu ta laga su representantenan papia cu clientenan cu ta papia 200 idioma y 75 dialecto.
Un representante di Alorica cu ta papia Spaño so por ehempel, por atende keho di un cliente cu ta papia Cantones na Hong Kong por ehempel. Alorica no lo tin cu contrata specificamente un representante cu ta papia Spaño.
Esaki ta e poder di AI, y potencialmente, e menasa; Ta posibel cu companianan no lo tin mester di asina hopi empleado si chatbot por lidia cu e cantidad di trabao na su luga, sinembargo, Alorica no ta recortando trabao. E ta sigui contrata agresivamente.
E experiencia na Alorica, y otro companianan incluyendo IKEA, ta sugeri cu AI posiblemente not a e asesino di trabao cu tur hende ta preocupa cune. Na luga di esaki, e tecnologia posiblemente lo ta mas manera avancenan den pasado, electricidad, steam engine, internet; Elimina algun trabao mientras e ta crea otronan. Y probablemente haci e empleadonan mas productivo en general, den beneficio eventual di nan mes, nan dunado di trabao y e economia.
Nick bunker, economista na Indeed Hiring Lab, a bisa cu e ta kere cu AI lo “afecta hopi, hopi trabao, talbes tur trabao indirectamente. Pero mi no ta kere cu esaki lo causa desempleo masivo. Nos a mira otro eventonan tecnologico den pasado y esnan aki no a resulta den un aumento den desempleo. Tecnologia ta destrui pero tambe e ta crea. Lo tin trabaonan nobo cu lo surgi.”
Den su fundeshi, inteligencia artificial ta podera mashin pa ehecuta tareanan cu anteriormente tabata rekeri di inteligencia humano. E tecnologia a existi den versionnan anterior pa decada, surgiendo den programa manera Logic Theorist, crea den aña 1950 na loke awo ta conoci como Carnegie Mellon University. Mas recientemente, pensa riba asistentnan activa y opera cu bos manera Siri y Alexa.
AI a drenta consenshi publico ora cu OpenAI a introduci ChatGPT, e herment di AI generativo cu ta conduci combersacionnan, ta skirbi codigo riba computer, compone musica, crea verslag y provee un cantidad sin fin di informacion. E yegada di AI generativo a aumenta preocupacionnan cu chatbot lo reemplasa escritornan freelance, editor, coder, telemarketing, representante di customer-service, paralegalnan y mas. “AI ta bay elimina hopi trabao actual y esaki ta bay cambia e manera den cual varios trabao ta funciona,” Sam Altman, CEO di OpenAI a bisa den un dialogo na MAssachusetts Institute of Technology den mei.
Sinembargo loke ta asumi tocante chatbot di AI, cu e lo inevitablemente reemplasa empleadonan di servicio, di mesun manera cu robotnan a tuma hopi di e trabaonan den warehouse, no ta birando un realidad di ningun manera amplio, no te ainda y probablemente nunca lo haci esaki.
White House Council of Economic Advisers a bisa luan pasa cu el a haya “tiki evidencia cu AI lo tin un impacto negativo riba trabao en general,” E conseheronan a nota cu historia ta demostra cu tecnologia tipicamente ta haci companianan mas productivo, ta apresura crecemento economico y ta crea tiponan di trabao nobo den maneranan inespera.
Nan a cita un estudio e aña aki lidera pa David Autor, un economista di MIT lider: El a conclui cu 60% di e trabaonan cu Mericanonan tabatin den 2018 no tabata existi den 1940, pues nan a ser crea pa tecnologia cu a surgi despues.
E compania Challenger, Gray & Christmas, cual ta monitor perdida di trabao, a bisa cu te ainda e mester mira evidencia tocante perdida di trabao a causa di AI.
“Mi no ta kere cu nos a cuminsa mira companianan bisa cu nan a spaar placa of corta trabao cu nan no tin mester mas a causa di AI,” Andy Challenger, lider di e agencia su ekipo di benta a bisa. “Esaki porta ta bin den futuro pero te ainda e no a sosode.”
Na mesun tempo, e miedo cu AI ta posee un menasa serio na algun categoria di trabao no ta sin base.
Tuma na cuenta Suumit Shah, un negociante di India cu a causa furor aña pasa pa medio di gaba cu el a reemplasa 90% di su forsa laboral cu e chatbot yama Lina. E movida na Shah su compania, Dukaan, cual ta yuda e clientenan crea website pa comercio online, a disminui su tempo pa contesta un pregunta for di 1 minuut, 44 seconde pa “instantemente.” Tambe el a recorta e tempo tipico necesario pa resolve problema pa mas di 2 ora na solamente 3 minuut.
“E ta tocante AI su habilidad di maneha problemanan compleho cu precision,” Shah a bisa via email.
Di manera similar, investigadornan na Harvard Business School, German Institue for Economic Research y London Imperial College Business School a haya den un estudio di aña pasa cu vacatura pa escritor, coder y artista a cay dentro di 8 luna despues di yegada di ChatGPT.
Den un estudio di aña 2023 na Princeton University, University of Pennsylvania y New York University, a conclui cu telemarketer y docentenan di Ingles y otro idiomanan no ta necesariamente nifica cu bo lo perde bo trabao. AI tambe por haci e trabao dificil of cu ta consumi tempo, dunando libertad pa hende haci otro tareanan creativo.
Chatbot tambe por ser usa pa e empleadonan traha di manera mas eficiente, complementando nan trabao na luga di elimina esaki. Un estudio di Erik Brynjolfsson di Stanford University y Danielle Li cu Lindsey Raymond di MIT a monitor 5,200 agente di sosten pa cliente na un compania di Fortune 500 cu a usa un asistent di AI. E herment a provee sugerencianan valioso tocante con pa lidia cu e clientenan y tambe a provee link relevante na documentonan interno.
Esnan cu a usa e chatbot, segun e estudio, a tabatin 14% mas productividad compara cu coleganan cu no a haci esaki. Nan a atende yamadanan y a completa nan mas lihe tambe. E ganashi di productividad mas grandi, 34%, a bini for di e empleadonan cu menos habilidad y menos experiencia.
