“E fundacion ta un bon ehempel di con gobierno, sector priva, ATA y hotelnan ta traha cu otro den transcurso di e añanan”, asina CEO di Ahata James Hepple a bisa, prome cu e duna un bista di con e Hospitality and Security Foundation ta funciona y kico nan ta haciendo cun’e actualmente.
“Basicamente e directiva di e fundacion di siguridad, Aruba Hospitality & Security Foundation ta consisti di Sr. Hepple como presidente, Patrick Melchiors di ATA cu ta representa ATA den e fundacion, cual ta haci cu nan ta bon informa di loke ta tumando luga y por contribui na discusionnan y planificacion. Tambe tin Andrew Hoo cu ta Hefe di polis na Noord y responsabel pa e polisnan cu ta traha na lama, e tambe na mes momento ta representa e minister encarga cu husticia. Hunto ta traha cu hotelnan y minister di Husticia, y via ATA cu e minister encarga cu turismo. Hunto ta traha y coordina tur actividad, Sr. Hepple a bisa.
Mas polis den area turistico
“Obviamente nos ta traha hopi di cerca cu comisario di polis y su team pa determina nan necesidad pasobra e prome meta di e fundacion ta pa sostene polis. Mi ta corda cu mas o menos 2 pa 3 aña den e fundacion, e Visibility Team a wordo crea. Por corda cu na 2012 a dicidi cu CEA no tabata mes efectivo cu e por tabata y acuerdo a wordo haci cu comisario di polis y minister di husticia cu sosten completo di minister di turismo tambe, cu polis lo provee mas polis uniforma completamente entrena den areanan turistico principal, cual tabata rekeri. Y e fundacion lo sostene nan. Desde e dia ey, a mira mas polis uniforma den e area, cual a mustra di ta hopi exitoso. Mi ta contento di bisa cu augustus e aña aki 25 polis lo bolbe den e area aki despues di entrenamento intensivo, pues lo mira mas polis den e area turistico.”
El a sigui splica cu e meta di e fundacion no ta solamente pa sostene e cuerpo policial actual, sino tambe pa e cuerpo policial crece y mas polis bin acerca. E plan cu tin pa e aña aki ta mustra cu nos ta sostene presencia di cuerpo policial den Palm Beach, Eagle Beach y caya grandi. Pero tambe den combersacion cu e directiva nos ta reconoce cu turismo ta full rond di isla y no ta concentra of keda un caminda solamente. Tin hopi turista cu ta opta pa keda den apartamento of condominio priva cu no ta necesariamente den area di hotel. Pues mester sostene polis segun cu nan ta adapta y tene esaki den consideracion. Tambe algo cu Sr. Hepple a bisa di ta hopi contento cun’e, ta cu lo tin un maneho nobo di beach policy cu lo drenta na vigor pronto. Claramente mester recurso di polis pa asisti den monitor y reenforsa e regla nobo nan aki. E fundacion lo yuda pa beach polis y polis maritimo tin e recurso. E fundacion dos aña pasa a cumpra e boto grandi di polis y aña pasa tres wave runner cual tambe ta haci gran diferencia ora di controla e area. “Nos lo keda sostene polis maritimo cu cualkier recurso cu nan ta rekeri”.
Camara den area di beach
Un punto cardinal cu ta atendiendo cun’e ta pa wak si tin un manera pa haya mas camara den areanan turistico, banda di e camaranan cu ta wordo proponi actualmente. Sr. Hepple ta bisa cu tin otro solucion y e fundacion ta evaluando pa cumpra loke nan ta yama “mobile camara towers”. Esakinan a wordo uza na Corsou y tabata hopi efectivo, basicamente nan ta un unidad mobil cu ta traha a base di energia solar y tin un mast hopi largo cu bo por hisa te 15 pa 20 meter halto, wifi pa manda señal entre otro, basicamente nan por wordo poni unda cu bo kier pone y por move facilmente. “Ami cu Andrew a bay mira esakinan na Corsou y ta gusta locual cu nos a mira, pues nos ta spera cu e camaranan aki pronto lo por bin aki tambe. Banda di esaki nos lo ta cumprando uniform nobo y reemplasa algun bicicleta cu polisnan ta uza pa haya aumento den nan mobilidad y visibilidad.”
Training di e polisnan y siguridad di hotel ta hopi importante, e fundacion lo ta pagando pa training di 250 personal di siguridad pa participa y pa nan haya nan certificacion pa deal cu bishitante mas miho y mas efectivo. “Tourism oriented police”, ta algo cu nos a bay ta haci pa dos pa tres aña y basicamente, polisnan regular ta wordo entrena pa traha cu e necesidad di bishitante y ta un sistema cu a copia for di Orlando unda cu tin poblacion grandi di turista. A trece un persona aki y a entrena te cu aworaki 150 polis y lo ta entrenando 80 mas. Tin banda di tur esaki mas ekipo pendiente pa yuda e mobilidad di polis entre otro ta lease auto y fix seguro pa tur esakinan. Segun Sr. Hepple, asina por mira cu e ta un bon programa, ta gradici minister pa sostene esaki y ATA pa yuda cu esaki.
E fundacion
“E Hospitality and Security Foundation a wordo crea na 2001 pa e hotelnan uzando fondo cu a ricibi di impuesto di camber y duna polis pa sostene nan necesidadnan. Ahata a bay di acuerdo cu e impuesto di camber cu tabata wordo colecta ta bay na ATA pa promove e destinacion, como cu a haya cu esey ta e manera mas efectivo pa haci’e. Durante e discusionnan aki minister a bay di acuerdo cu e porcion di impuesto di camber cu tabata wordo aloca pa e fundacion, lo keda wordo funda pa ATA. Nos a sostene esaki pasobra esaki tabata kiermen cu e fundacion lo continua. A base anual e cantidad ta 720 mil florin cual ta un suma halto cu ta yuda polis hopi.”
.jpg "Pa locual ta trato na nos turistanan Un solo caso riba su mes por haci daño na nos economia")
