Mirando cu awe Parlamento di Aruba ta bay trata e ley di BBO na frontera, Aruba Hotel and Tourism Association hunto cu Aruba Food & Beverage Association a dirigi un carta na Parlamento, pa asina trece nan preocupacionnan relaciona cu e ley aki dilanti pa nan consideracion.

Den nan carta, e gremionan comercial ta dirigi nan mes na Parlamento indicando cu nan a nota cu ta bay cuminsa awe cu deliberacionnan relaciona cu introduccion di BBO/BAVP/BAZV durante importacion. Nan ta indica cu nan kier reitera puntonan cu nan a yega di expresa caba despues di nan reunion publico cu Parlamento dia 22 di juni, pa cual ta pidi nan atencion urgente.

E puntonan ta:
E texto actual di e ley ta limita e offset di e 7% di impuesto paga na momento di importacion cu e BBO colecta for di clientenan pa intercambia bienes (“handelsgoederen”) solamente. E ley no tin un definicion cla di bienes comercial y ehempelnan limita den e nota splicativo, cual nan ta bisa ta bay crea hopi discusion riba kico ta considera bienes comercial y kico no ta. Tambe ta dificil pa administra y dificil pa Belastingdienst audita esaki.

E nota splicativo (“Memorie van Toelichting”) specificamente ta exclui restaurant y hotel for di ta eligibel pa offset, maske den conferencianan di prensa di gobierno dia 22 di juni a menciona cu lo retira e restriccion pa restaurant. No a duna mas guia ni hustificacion legislativo.

Tur compania y tienda, hasta esnan cu ta bende solamente “handelsgoederen,” ta importa articulonan cu no ta pa bende. Por ehemplo, nan ta menciona forklift pa warehouse, ekipo, suministro, producto rekeri pa acuerdonan di frankisia, articulonan cu no ta disponible riba e isla, etc.

E limite di bienes comercial tin un efecto directo riba costo pa tur negoshi y consecuentemente riba prijs di consumidor.

Den ultimo dies aña, cost of doing business ya a aumenta significantemente, pa motibo di medidanan anterior manera aumento di BBO/BAZV/BAVP di 1.5% pa 7%; 18% di aumento den salario minimo; aumento di contribucion di dunado di trabao pa AOV cu 1% di salario; reduccion di oranan den siman laboral di 48 pa 45 ora; varios tarifa nobo den banco; tarifa di benta y compra di divisa; tarifa pa maneho di desperdicio pa cliente comercial; aumento di 50% den grondbelasting y e eliminacion di e maximo liber di impuesto (Afl.60mil); limite riba depreciacion; impuesto special riba alcohol di 8% riba biña y 44% riba distilled; BBO riba seguro, recien introduci; beneficionan adicional pa empleado, manera mas dia di vakantie, agrega den ley; a agrega BBO riba servicionan electronico stranhero; y aumento di tarifa di coriente y awa (cu 17% y 24%).

Cu introduccion di un 7% adicional riba importacion, tur prijs na Aruba ta bay aumenta mas ainda.

E aumento di gasto di cada compania ta bay ta agrava pa e hecho cu cada bendedor local cu ta suministra of duna servicio tambe ta bay mester aumenta nan prijs.

Specificamente lista restaurant y hotel for di offset ta discriminatorio y simultaneamente ta crea aumentonan inmenso den e cost of doing business, cu ta resulta den un costo mas halto pa sali come pa tanto local como turista.

Aruba ya ta considera como un destinacion caro pa turismo, y e medida aki lo haci restaurant (y otro negoshi) mas caro ainda, aumentando riesgo pa e industria.

Si ta permiti un supermercado pa transforma nan galiña importa den un chicken salad y ta permiti pa offset e BBO (manera a indica den e conferencia di prensa di gobierno dia 29 di juni ultimo), e ora tambe lo mester permiti restaurant pa cushina e galiña y keda eligible pa offset. Trato igual ta esencial den ley.

E hecho cu e limitacion di bienes comercial ta bay causa aumentonan asina grandi den prijs y un peso riba e comunidad local, ta rekeri pa elimina e limitacion aki for di e ley. Door di elimina e termino “handelsgoederen”, e ley ta bira menos dañino pa negoshi y pa comunidad. Cu e cambio aki, e ley ta mas cerca di e sistema di BTW preferi, y ainda lo logra un aumento di entrada di impuesto pasobra e ta forsa negoshinan cu actualmente ta opera den economia informal pa paga na momento di importacion.

E motibo cu representantenan di gobierno a duna pa tin mester di e limitacion di bienes comercial den e ley, ta cu gobierno mester e entrada mas halto pa paga debe. Sinembargo, di otro banda gobierno ta emitiendo bono na un tasa di interes di 6.5% pa genera capital mientras cu prestamonan cu menos interes ta disponible a traves di Hulanda. Mientras tanto, no tin transparencia riba e surplus di entrada cu gobierno a ricibi desde cu a aumenta BBO cu 1%.

E aumento den entrada pa gobierno por keda logra cu e siguiente esfuersonan combina:
A. BBO na frontera (sin limitacion di bienes comercial) cu ta bay colecta for di negoshi cu actualmente ta opera den economia shinishi y for di residentenan cu ta importa bienes;
B. E surplus di aumento di 1% di BBO;

C. Aumenta cumplimento cu pago di impuesto;

D. Reduci gasto di gobierno, y reduci e peso cu ta pone riba comunidad pa financia aparato gubernamental.

Concluyendo nan carta, Aruba Food & Beverage Association y Aruba Hotel & Tourism Association ta urgi Parlamento pa considera e eliminacion di e termino “handelsgoederen” for di e ley, y pa elimina e exclusion di hotel y restaurant for di e nota splicativo, pa asina evita aumentonan inmenso den prijs na Aruba.

AHATA a informa cu nan a ricibi reaccion di minister di Finanzas, Xiomara Maduro, cu a indica cu lo haci areglo pa restaurant den Ministriele Regeling. Sinembargo, nan ta cuestiona ainda pakico no por a regla esaki caba den e nota splicativo (Memorie van Toelichting).

Ademas, e preocupacion ta keda cu si ta regla pa restaurant y ta laga e definicion di “handelsgoederen”, ainda gasto lo aumenta y prijs tambe lo aumenta, pasobra ta importa hopi cos cu no ta pa bende. Dus tur compania cu ta duna servicio na otro compania, nan prijs tambe lo mira aumento. Gasto ta subi pa tur, pues prijs lo keda aumenta.

Aruba Trade and Industry Association (ATIA) a haci un apelacion similar na minister di Finanzas. Por lesa esaki riba pagina 5.

Manera menciona, awe ta bay trata e ley di BBO na frontera den Parlamento.