ATA, AHATA y tambe Despa ta traha hunto pa loke ta distribucion/publicacion actualisa di virus Zika. Segun Ahata, ta na altura di 2 cancelacion di reservacion hotel. Mientras cu ATA su team ta monitor tur locual cu wordo publica di Aruba internacional y percura pa informacion oficial wordo publica internacional y local.
Ahata (Aruba Hotel and Tourism Association)
James Hepple CEO di Ahata ta bisa cu tin cantidad abou di cancelacion na hotelnan y cada hotel ta atendiendo cu e cancelacionnan a base di nan mesun “policy”. E por bisa cu kisas den dos caso e sa sigur cu e personanan a indica cu ta pa motibo di embaraso nan a opta pa cancela nan reservacion pa preveni cu ta core cualkier riesgo pa haya Zika.
Segun Sr. Hepple awo cu WHO a indica cu e virus ta un emergencia di salud publico, e ta spera cu hende rond mundo wordo miho informa di e paisnan cu tin e virus y e peligernan. A puntra Sr. Hepple si e tin algun preocupacion pa e desaroyo aki cual el a indica cu berdad ta e caso mirando e atencion cu e topico ta hayando mundialmente cu por cay negativo pa Aruba. Sinembargo, el a bisa cu e ta spera cu awor hendenan por haya informacion corecto y tene cuenta cu no tin relacion estableci ainda entre e defectonan di baby y e virus, cual ta e preocupacion grandi pa hopi.
Reaccion ATA (Aruba Tourism Authority)
CEO di ATA Ronella Tjin Asjoe – Croes a bisa Bon Dia cu ta trahando di cerca cu Ahata y Despa diariamente y esunnan concerni cu ta informa comunidad local tambe. “Ahata ta hopi clave den esaki, nos ta monitoria si cancelacionnan ta drenta y cuanto esakinan ta. Tin cancelacionnan cu a drenta pero esakinan ta hopi sporadico te cu aworaki pues ainda no a mira un encremento significante den esaki,” El a splica.
Segun Sra. Tjin Asjoe – Croes comprendibel ta e hecho cu ta hendenan na estado ta esunnan cu ta prefera di no tuma risico. ATA ta na altura di noticia internacional cu hende muhe na estado ta opta pa cancela nan biahe. Pa loke ta e cancelacionnan, Sra. Tjin Asjoe – Croes a bisa cu nan a tuma nota cu diferente aerolineanan entre otro ta hopi flexibel pa ‘rescheduling’ cual ta hacie mas facil pa personanan principalmente na estado por planifica otro fecha di biahe.
“Nos ta (a base local y internacional), transmiti locual e autoridad oficial (Despa) ta bisa di e situacion na Aruba.”
Seccion cu ta atende cu Internacional, ta hopi extenso riba e topico y tin reaccionnan formula caba. Departamento di PR y esunnan cu ta monitoria tur locual cu ta wordo papia di Aruba internacional, por duna un reaccion den diferente situacion a base di informacion oficial di Aruba, el a termina bisando.
