CEO di Aruba Hotel & Tourism Association (AHATA), Tisa Lasorte tabata presente recientemente den e Earth Day Forum 2024, caminda a expresa cu loke ta sucediendo cu cambio climatico y kentamento global ta un riesgo hopi grandi pa henter mundo, specialmente pa islanan chikito manera Aruba.

Dialuna ultimo, a celebra e Dia Mundial di Mama Tera cu un foro tocante e tema di resiliencia climatico, den e foro aki diferente personalidad den e veld tabata presente y ademas e CEO di Aruba Hotel & Tourism Association (AHATA), Tisa Lasorte, ken a sigura cu Aruba como isla chikito lo por bira un victima hopi grandi di aumento di nivel di lama.

Aumento di nivel di lama (sea levels rising), ta ora oceannan rond di mundo ta aumenta nan nivel debi efectonan di kentamento global. Kimamento di combustible fossiel ta un di e causanan di esaki, pa motibo cu ta libera carbon dioxide y otro gas cu ta keda den e calor di atmosfera. Despues oceannan ta absorbe mayoria di e calor aki. Na medida cu awa di lama ta bira mas cayente, ta duna como resultado un aumento den nivel di oceannan rond mundo.

“No solamente turismo, sino henter e pais lo tin hopi riesgo. Loke ta pasa ta cu prome cu nos por tin un plan di kico nos ta bay haci pa Aruba, bo mester haci un analisis di kico precies ta loke por pasa na Aruba. Loke nos ta sponsor ta e estudio cu lo wordo haci yama CORVI, cu lo delinea kico ta e riesgonan exactamente cu Aruba tin, pasobra ora bo tin un plan di riesgo special, e ora bo tin cu crea e accionnan cu bo mester tuma pa mitiga e problema di global warming specialmente pa Aruba,” el a sigura.

Pa AHATA e topico aki ta hopi importante no solamente pa turismo, pa motibo cu si den futuro e beachnan desaparece por ehemplo, no tin turismo mas y esey kiermen cu ta afecta henter economia y e pais. Nan ta compronde cu esaki ta un problema cu ta biniendo for di algun aña caba pero nunca ta mucho laat, manera Lasorte a splica.

“Ta hopi importante pa tur hende na Aruba compronde cu ta pa nos defende nos naturalesa y ora bo ta defende bo naturalesa, bo ta defende bo economia tambe. Sin un Aruba bunita bo no tin actividad economico tampoco, dus e ta un balans cu nos mester tin na cuenta y cu lo mester di un bon plan, mester scucha tur hende, e comunidad, personanan cu ta biba na Aruba, comercio, tur hende mester ta envolvi den un plan asina pa tuma e decision pa Aruba su futuro,” Lasorte a señala.

Pa loke ta trata e ley di Derecho di Naturalesa cu minister Ursell Arends ta impulsando, Lasorte a expresa cu “nos ta apoya e hecho cu nan kier hinca e derecho di naturalesa den nos Constitucion, esey ta duna e ora ey e oportunidad cu den futuro mas instancianan por usa un proceso legal pa defende nos naturalesa.”