Aruba Hotel & Tourism Association (AHATA) y su miembronan di sector “vacation rental” tin hopi tempo ta boga pa Aruba logra mihor cumplimento di pago di impuesto den sector di vacation rental. E companian cu ta maneha vacation rental y ta miembro di AHATA tur ta cumpli cu impuesto na Aruba y ta desea pa henter e sector cumpli mescos.
Construccion di apartamento y cas pa uso den e sector ta sigui crece, pero un grupo grandi di “vacation rentals” no ta paga impuesto. Mientras cu ta hisa gasto di impuesto pa personanan y companianan cu si ta cumpli cu e deber, e grupo cu no ta paga ta beneficia di tin menos gasto. E situacion ta crea un desigualdad den e sector. E doñonan di cas y apartamento cu no ta cumpli cu impuesto tin hopi menos gasto y por cobra prijs mas abao na turista. E resultado ta un mercado na Aruba di competencia inhusto. Ademas, nan ta goza di e demanda cu mercadeo ta crea pa Aruba, sin contribui na e fondonan necesario pa hasi e trabao di mercadeo.
Despues di varios aña ta discutiendo e topico cu gobierno y ehectuvionan di departamento di impuesto, AHATA a traha cu su miembronan di e sector y cu Grant Thornton pa produci un rapport cu recomendacionnan pa nos Departamento di Impuesto (DIMP).
Presidente y CEO di AHATA, Tisa LaSorte, a manda e documento pa directora di DIMP, Luenne Gomez-Pieters, cu copia pa Aruba su Minister di Finanzas, cu e intencion di contribui na solucionnan productivo pa nos pais. Mihor cumplimento ta trese mas entrada pa gobierno y ta crea competencia husto den e sector di turismo.
E rapport ta inlcui: introduccion di regulacion efectivo, recomendacion pa amienda di ley, introduccion di sistema di registracion, y creacion di un plataforma digital (den diferente idioma) cu tur informacion necesario pa doñonan di cas y apartamento conoce nan deber y e pasonan cu mester tuma.
AHATA ta keda pendiente pa ofrece su contribuicion y participacion den crea e solucionnan necesario.
