Diamars 24 di mei, representantenan di AHATA riba invitacion di Minister di Turismo a atende un reunion cu e Minister pa discuti mas den detaye e implicacion di e introduccion di e legislacion cu ta proponi pa regula tur acomodacion “all-inclusive”.
Aruba Hotel and Tourism Association (AHATA) a laga e Minister sa cu basa riba combersacionnan cu hopi miembro di Parlamento, cu otro Ministernan y e comunidad en general cu AHATA ta compronde cu tin un falta substancial di conocemento y comprondemento di e modelo moderno di “all-inclusive” y mas importante, di e forma cu hotelnan ta opera en general.
Consecuentemente AHATA a propone na e Minister pa bin cu un “cooling off period” pa permiti un discusion mas a fondo di e asunto pa e siguiente motibonan:
Ø Cu por tin un esfuerso combina pa reevalua e documentonan disponibel di PWC y otro informacion disponibel pa e dos partidonan
Ø Pa estudionan/analisis adicional por tuma luga
Ø Cu otro metodonan, banda di legislacion, por wordo explora pa na un forma responsabel acepta y maneha tur modelo all-inclusive como parti di e distribucion di Aruba su turismo. Esaki mester inclui educacion di e restaurantnan y tiendanan di e clase medio tocante miho mercadeo pa aplica den e segmento specifico aki
Ø Cu Aruba su medio ambiente di inversion sano y globalmente admira mester ta protegi y cu esaki su stabilidad economico
Ø Y cu mester expande e grupo di trabao y inclui e Ministernan di Salud Publico, di Finansa y di Asuntonan Economico.
Un intercambio di puntonan di bista completo y sincero a tuma luga durante di e reunion, cual a conclui cu e acuerdo cu lo tin un siguiente reunion riba diahuebs 2 di juni pa sigui cu e discusionnan.
E posicion di AHATA ta masha simpel. AHATA ta kere cu si e ley pasa cu e contenido actual:
1. E lo tin un impacto negativo significante riba e confiansa di parti di inversionistanan pa cu Aruba y haciendo esaki, lo crea un clima economico cu no ta stabiel.
2. E lo crea un situacion di un medio ambiente di mercadeo completamente desbalansa, unda cu algun propiedad ta wordo recompensa y otronan ta wordo castiga pa e forma cu nan ta scoge pa bende nan cambernan of apartamentonan. Esaki por resulta den ceramento di restaurantnan den hotel, y hasta ceramento di e hotelnan. Na fin di dia e sector lo tin cu reacciona riba demanda di mercado cu ta cambia continuamente si e kier sobrevivi!
AHATA ta den espera pa reuni cu Gobierno den su totalidad pa discuti e asunto aki mas a fondo, mirando e probabilidad di un impacto negativo riba sector turistico di Aruba, cual ta general 90% di e entradanan di nos pais y directamente ta brinda trabao na 17 mil persona y indirectamente ta percura pa empleado na mas di 31 mil persona. AHATA ta kere cu pa medio di studia y explora tur e alternativanan posibel lo sirbi e miho interes di Aruba.
