Ultimamente tin casonan di insiguridad den sector turistico y area di hotel, unda cu tabatin varios atraco. A acerca AHATA pa aclaria algun stap cu por ta tumando pa siguridad di turismo.
CEO di AHATA, Tisa LaSorte a comparti cu semper tin preocupacion pa siguridad. Teniendo na cuenta cu ora persona bay bishita un pais, nan ta considera e siguridad di e pais ora di tuma vakantie.
Esaki no ta cambia pa Aruba, ora turistanan bishita, nan kier sinti nan mes sigur. “Nan kier disfruta y ricibi bon servicio, pero mas cu tur cos nan kier ta sigur.” E ta duna di conoce cu semper tin e preocupacion pa siguridad di miembro di compania, miembro di pier, of hotel pa nan tin camara, of security.
Tambe tin cooperacion cu polis den cierto caso, pa asina purba yuda si tin video of imagen pa por haya e persona culpabel di cualkier ilegalidad. “Semper tin cooperacion cu nan team, tambe e team di security ta haya training pa prevencion. Tin mas wowo pasobra en berdad ta algo negativo.”
Segun LaSorte, otro factor cu por afecta turismo negativamente ta cu un persona cu pasa den un atraco of di otro forma ta victima di ilegalidad, eventualmente ta bay bek su pais y por conta su storia na noticia of conta mas hende. Por ta algo cu por daña turismo. E ta kere cu e preocupacion di nan semper ta pa tur hende bin Aruba y gosa, pero tambe ta preocupa riba efecto negativo cu por tin pa futuro. “Hopi biaha hende ta lubida con fragil industria turistico ta.”
Cualkier incidente, sea grandi of chikito, por cambia e rumbo di industria. Pa e motibo ey semper lo keda preocupa. Tambe mester keda depende di autoridad pa haci nan trabou, pero sinembargo, e ta remarca cu nan ta coopera mas cu ta posibel.
Pa locual ta trata den caso cu hende por drenta cierto tienda, hotel of luga pa atraca, kico lo haci pa pone mas control of tin mas siguridad? Lasorte ta bisa cu ta trata di un decision dificil pa tuma, pasobra si bay pone security tur caminda, e ta duna un bista di ‘no ta welcoming’. Esey por cambia experiencia di mas hende.
No ta algo cu por soluciona facilmente, pero si e ta bisa cu ta berdad cu mester tin cooperacion cu otro. Tambe kier mehora comunicacion entre polis y team di siguridad cu tambe ta envolvi den mesun area.
Sinembargo LaSorte ta bisa cu Aruba Hospitality Security Foundation ta traha hopi riba e comunicacion. Si tin hende cu ta mira algo, pa nan pone atencion pa siguridad. E fundacion ta trahando pa mas training y trece mas prevencion.
“Nos ta haciendo nos esfuerso, cooperando y colaborando cu cuerpo policial; pero e preocupacion ta keda y ta keda puntra nan mes kico nan mas nan por haci. Esey ta keda e combersacion, pasobra pa haci Aruba sigur en berdad ta keda un preocupacion”, el a expresa.
Sinembargo e ta agrega cu e ta algo cu nan ta palabrando for di hopi tempo cu e fundacion. E trabou di e fundacion ta traha riba kico nan por haci pa e sector y unda tin mas actividad di turista cu ta cana rond. Sea ta negoshi, restaurant den area nan hotelero; si mester bin cu mas camara, siguridad; responsabilidad di gobierno, si tur tin cooperacion cu otro pa asina e turista ta mas protegi. LaSorte a informa cu e fundacion mes a caba di cumpra set di camara adicional, cu a yega Aruba.
Ta cosnan cu ta planeando y trahando riba dje.
Tambe a comparti cu ATA tambe a pone mas luz banda di caminda y mester mas na algun luga cu ta scur. Pa locual ta trata camara, ta wardando e fase di instalacion. Esey ta pasa henter e proceso di coordinacion, unda polis a pidi sector priva pa coordina y conecta algun camara cu otro.
El a bisa cu tin cosnan na caminda, pero ta laga na cada hotel pa check y dicidi e stap cu ta tuma. Sinembargo, si ta haci training pa cada persona por ta mas efectivo y bon den nan trabou. “E idea ta pa crea mas wowo sabi den e area, pa asina preveni. Esey ta idea simpel tras di dje.”
