Diabierna ultimo dia 19 di augustus, Parlamento di Aruba a cuminsa cu tratamento den e prome rond di preguntanan, pa e proposicion pa cambio den ley di e forma con ta otorga permiso pa hotelnan y pa regula e sector di hotelnan All Inclusive den nos turismo. Ta lamentabel cu algun miembro di Parlamento ta votando riba un asunto cu obviamente nan no ta compronde of ta ignorando informacion suministra na nan dor di Banco Central di Aruba.
Un miembro di Parlamento aparentemente ta kere, basa riba informacionnan bieu di otro fuentenan, cu huespednan den hotelnan All Inclusive no ta sali for di e propiedad. Banco Central ta bisa nan lo contrario den su rapport, splicando cu nan ta sali y nan ta gasta den nos economia. Un otro ta kere cu empleadonan den hotelnan All Inclusive no ta ricibi tipnan, locual no ta cuadra cu berdad tampoco. E empleadonan aki ta participa den e “service charge” y tambe ta ricibi tipnan.
E rapport di Banco Central ta contene un cantidad enorme di informacion cu no ta sostene e posicion di Gobierno. E rapport ta bisa entre otro:
* Cu no tin evidencianan pa sostene e pensamento cu turismo All Inclusive tin un impacto economico negativo pa Aruba.
* Cu no tin evidencia cu turistanan den hotelnan All Inclusive no ta bandona e propiedad, cu nan no ta come afo of gasta pafo di e hotel.
* Cu no tin evidencia cu hotelnan All Inclusive no ta ofrece calidad.
Y mas ainda e rapport ta subraya cu si e ley aki pasa, cu e lo por tin un impacto negativo serio riba oportunidadnan di inversionnan existente y den futuro y cu e lo restringi e forma con hotelnan por reacciona riba cambionan den condicionnan di mercado. Y ta esaki ta precisamente locual AHATA a bin ta bisa di masha tempo caba. De facto, Banco Central na un forma conservativo ta kere cu e daño conta na placa lo ta di por lo menos 160 miyon florin!
Banco Central mes ta bisa cu no tin suficiente informacion pa por tuma un decision asina serio, mescos cu ATIA, Camara di Comercio, sindicato FTA, ATSA y Aruba Gastronomic Association (AGA) y varios otro partner den comercio a duna di conoce caba den e ultimo lunanan aki.
