Aruba Hotel & Tourism Association (AHATA) a haci un encuesta cerca hotelnan pa midi progreso den ocupacion y expectativa pa recuperacion di turismo. E resultado a demostra cu recuperacion ainda ta poco poco.
Proyeccion pa ocupacion den luna di juli ta keda na 9%. Hotelnan ta raporta cu continuamente ta sigui ricibi cancelacionnan. Expectativa ta pa un ocupacion averahe di 18% na augustus y crecemento gradual cu lo yega ocupacion di 40% na december. Tin indicacion cu hotelnan Timeshare lo tin ocupacion mas halto na juli, proyecta na 35%.
E temporada di recuperacion ta largo y ta un temporada unda gasto ta hopi mas halto cu entrada pa companianan cu ta depende di turismo. Ayudo financiero manera subsidio di salario ta necesario pa por mantene mas tanto compania cu ta posibel habri y mantene e nivel di empleo. Asina mes e salario ta solamente un parti di tur e gastonan di un compania, kiermen e subsidio ta yuda cu un parti so. Pero, sin e subsidio durante temporada di recuperacion gradual, hopi compania lo mester cera porta of restructura.
