A pesar cu nos tin varios scol cu ta prepara nos hobennan adecuadamente den e ramonan di hospitalidad y turismo, AHATA ta mira cu berdaderamente no tin suficiente persona ainda cu ta sali ya sea di scolnan of universidad, y despues ta bay busca trabou den turismo. Principalmente awor cu gobierno a duna permiso pa bin cu un hotel nobo di 900 camber den e area di Sero Colorado.

Director General di Educacion Profesional Intermedio (EPI) Ryan Maduro, a referi na e situacion di studiantenan cu ta wordo prepara den nan unidad di hospitalidad y turismo pa subi e mercado laboral. E ta haya dificil pa trece dilanti si berdaderamente no tin interes di nan pa traha den e sector di turismo. Maduro a laga sa cu e ta gusta papia a base di evidencia. Solamente a base di un estudio por demostra esaki.

Ta existi un necesidad real pa yena e vacatura di trabou cu tin pa hospitalidad. Si nan ta wordo compara cu e cantidad di studiantenan cu EPI tin den e unidad aki, e ta haya cu nan ta poco pa yena tur e vacaturanan aki. Ya cu si tin necesidad di un gran cantidad di empleadonan nobo, e ta considera cu den e caso aki, EPI mester ta e instituto cu ta facilita educacion pa e hendenan profesional por drenta den e industria aki, cu ta pilar di nos economia.

Nan averahe di graduacion ta entre 250 pa 300 studiante. Esey ta over di tur e cuater unidad e cantidad di studiantenan gradua cu nan ta produci. Ainda e aña no tin un cifra, ya cu nan tabata bezig ainda cu Inspeccion di Enseñansa pa caba di finalisa e graduacion.

Sinembargo, basa riba su experiencia profesional, ya cu hunto cu su colega Andres Geerman, nan a yega di maneha e unidad aki pa 13 aña, e por bisa cu for di cu e studiantenan aki ta cuminsa core stagiaire caba, nan ta wordo contrata den empresanan cu tin di haci cu turismo pa cuminsa traha. “Hopi di nos studiantenan ta trahando caba den e industria, mientras cu nan ta cabando nan estudio.”

El a sigura cu basa riba su experiencia, al contrario ta existi mas bien un necesidad grandi pa mas studiante drenta den EPI su programa di hospitalidad. Como consecuencia di esaki, EPI su Unidad di Hospitalidad y Turismo ta trahando riba innovacion di nan programanan. Ya cu nan a yega di constata pa un par di aña caba cu nan tin nivel 3, tambe nivel 5, cu ta un sorto di ‘associate degree’. Pero e nivel 4 no ta ofreci ainda. Maduro a informa cu nan a logra e acuerdo pa cuminsa cu programa aki den e aña cu ta bin. Nan vision pa 2020 ta pa start cu e vision aki, cu ta crea oportunidad pa mas studiante bin sigui nan formacion na EPI su Unidad di Hospitalidad y Turismo.

Igualmente, e ta haya cu e acuerdo of MoU cu recientemente EPI a firma cu American Hotel & Lodging Educational Institute (AHLEI), lo yuda hopi pa sigui capacita y stimula e trahadonan di e sector di hospitalidad. Pasobra loke AHLEI ta ofrece ta un portafio de programanan di certificacion pa adultonan; esunnan cu kier drenta den e mercado laboral, of esunnan cu ta trahando caba y nan kier eleva nan mes den trabou. Pero tambe e ta un certificacion internacionalmente reconoci y cu ta duna nan e forsa pa sigui crece den nan trabou.