E aumento di salario minimo a bini como sorpresa pa algun gremio di comercio. Manera cu nos ta informando e ultimo dianan aki riba e tema, no ta tur gremio comercial ta contento cu e manera con esaki a wordo introduci. Nos a acerca presidente di Ahata James Hepple pa su reaccion.
“Nos ta desapunta cu e manera con el a wordo implementa pasobra nos sa cu gobierno a discuti esaki mas prome den aña. Anto mi sa cu e conseho cu nan a haya no tabata pa aumenta na e momentonan aki pasobra e economia ta hopi debil”, sr. Hepple ta bisa Bon Dia.
Ahata tabata mesun sorprendi cu cualkier otro gremio pa a haya sa e noticia aki via di prensa. Na un banda Ahata ta compronde pakico el a wordo haci aworaki. Sinembargo segun sr. Hepple: “Nos ta desapunta cu tin asina hopi retonan cu economia di Aruba ta enfrentando, cu manera sector comercial/industria, nos lo a prefera di dialoga esaki cu gobierno den un contexto mas amplio. Mescos cu nos a haci anteriormente ora cu dialogo social tabata funcionando.”
Trahando hunto
Cambio den un aspecto di e economia ta afecta un otro aspecto anto nos tur kier pa Aruba crece cu exito. Pero segun Ahata: “Nos mester tin e sentimento cu nos tur ta trahando hunto pa e meta aki. E cambio aki ta haci e dificil pa algun compania caminda mayoria di nan empleado ta traha cu salario minimo pasobra awo nan mester haci un ahustacion inespera.”
Impacto na economia
Generalmente den e sector hotelero, segun sr. Hepple, e mayoria di empleadonan ta cobra ariba di salario minimo. E cambio lo por tin su impacto mas na e otro areanan cu ta apoya e sector. Pa negoshinan mas chikito particularmente e ta bira mas dificil pasobra e costo di haci negoshi na Aruba ta hopi caro. “Pa tur hende e ta semper dificil y un desafio. P’esey nos lo a prefera si e decision lo a wordo tuma den un contexto mas amplio pa cubri tur locual ta impacta economia.”
Siguiente pasonan
Sr. Hepple no solamente ta presidente di Ahata, pero e tambe ta miembro di directiva di Atia. Pues sr. Hepple tambe lo reuni cu gobierno otro siman pa dialoga riba e tema aki. “Nos lo ta discutiendo tur e retonan cu economia di Aruba ta enfrentando y minister di Asuntonan Economico a dialoga cu nos caba constructivamente cual nos ta aprecia.” Ahata no lo pidi pa e aumento nobo aki wordo retira mirando cu el a wordo implementa caba pues e no lo ta posibel. “E ta djis un cuestion na con nos ta bay sigui traha hunto den futuro.”
