En conexion cu celebracion di Dia Mundial di Turismo, cu e aña aki e tema ta ‘Turismo y Trabou, Un miho futuro pa nos tur’, Aruba Hotel & Tourism Association (AHATA) a crea un plataforma nobo pa solicitante di trabou local cu no ta rekeri permiso di trabou.
A identifica cu na Aruba tin varios manera pa mira publicacion di vacaturanan pa empleo, pero no tin un lista di candidatonan buscando trabou. Aruba su industria di hospitalidad y turismo ta e pilar economico mas importante di nos economia, e parti di empleo y forsa laboral ta un factor crucial. Sinembargo, tin hopi vacatura cu ta keda habri pa hopi tempo sin haya candidato adecua. AHATA kier facilita e conexion entre e miembronan di AHATA su departamentonan di recurso humano como e comunidad local buscando trabou. Pa medio di ahata.com lo ofrece varios posibilidad pa conecta candidationan adecua, profesionalnan y studiantenan, cu trabounan disponibel den turismo.
Riba e pagina di ‘Careers’ di ahata.com por haya lista di e vacaturanan disponibel den sector di hospitalidad y turismo bou miembronan di AHATA. Tur siman por bishita e pagina pa actualisacion di vacaturanan nobo.
Awor AHATA ta introduci un aspecto nobo riba e pagina di Careers, cual ta ofrece posibilidad na profesionalnan local interesa pa uni na e forsa laboral di turismo por publica nan informacion. E departamentonan di recurso humano lo tin acceso na e seccion nobo. E intencion ta pa yuda conecta companianan den turismo cu candidatonan local di nan preferencia basa riba e experticio nesesario.
Personanan interesa por manda CV pa AHATA na careers@ahata.com, mencionando specialisacion y area di interes; esaki lo wordo añadi na e pagina ‘Conectando Localnan’.
Ademas AHATA lo haci un inventario di e vacaturanan pa core stage den e industria di turismo pa studiantenan di tur nivel. Di e forma aki e ta bira mas eficiente pa haya e tipo di informacion accesibel y pa studiantenan considera pa core stage den industria. E pagina www.ahata.com/careers tambe lo inclui un opcion pa CV di stagiarenan y nan interes. Esaki lo facilita miembronan di AHATA y su departamentonan di recurso humano pa conecta cu studiantenan mas lihe.
AHATA su meta ta pa facilita miembronan di AHATA pa yena e vacaturanan cu tin habri mas liher. Pa mas informacion por tuma contacto cu AHATA via careers@ahata.com.
Riba Dia Mundia di Turismo, AHATA ta felicita tur su miembronan, empleadonan y tur cu ta labora y ta parti di e pilar economico mas importante di nos economia cu ta nos industria di turismo.
