Recientemente miembronan di e gremio comercial, Aruba Hotel and Tourism Association (AHATA), Aruba Trade and Industry Association (ATIA), Kamer van Koophandel (KVK) y Comercianteman Uni Aruba (CUA) a dirigi un carta na minister di Labor, Energia y Integracion, Glenbert Croes, pidiendo clarificacion riba algun punto relaciona cu e energiebeleid y trancision pa energia renobabel.
Nan ta indica den e carta aki cu e documento “Energiebeleid” di Ministerio di Labor, Energia y Integracion, ta confirma cu tin necesidad pa Aruba prepara pa cambio di clima y crecemento di demanda di energia. E mesun documento ta declara cu mester converti e sistema di produccion di Aruba na energia cu ta autosuficiente y “klimaatneutraal”, via produccion di energia renobabel.
E asociacionnan a confirma cu nan ta di acuerdo cu e vision pa un transicion na energia renobabel mas pronto posibel, pero mientras tanto nan tin algun observacion cu nan ta pidi e minister pa clarifica.
“Mientras tanto nos por observa cu ainda tin retraso den inversion pa mas parke di molina y parke solar. Cu e carta aki nos ta pidi pa nos ricibi splicacion di y claridad riba contenido y efecto di e acuerdo entre nos gobierno y Eagle LNG, specialmente con e acuerdo ta afecta Aruba su planes pa crece nos dependencia riba energia renobabel y reduci nos dependencia riba energia cu no ta autosuficiente,” e asociacionnan ta indica.
Na mesun momento nan ta haci peticion pa un reunion cu e minister encarga pa asina nan por ricibi mas informacion y aclaria e puntonan cu nan a trece dilanti den e carta.
E asociacionnan a dirigi e carta tambe na director di Utilities Aruba N.V., sr. Anthony Rojer, director di WEB Aruba N.V., sr. Alfredo Koolman y director di N.V. ELMAR, sr. Anthony Irausquin.
Algun tempo pasa minister Croes a anuncia e inicio di e proyeccto di LNG, locual a genera controversia den comunidad.Ciudadonan a cuestiona pakico tin tanto secresia alrededor di e proyecto aki y hopi a apunta e falta di transparencia desde cu a anuncia e proyecto aki na prome luga.
Mester menciona tambe cu den un rapport comisiona pa minister di Asunto Economico y Clima di Hulanda, TNO a adverti cu e sostenebilidad continuo di e produccion di electricidad na Aruba ta limita pa e contract firma pa LNG. Nan ta resalta tambe cu tin poco informacion publico tocante e acuerdo di suministro di LNG.
Un punto cu no ta prome biaha cu asociacionnan ta trece dilanti y cu ademas no ta soalemnte e asociacionnan ta cuestiona. A pidi y ta keda pidi gobierno pa mas transparencia y informacion tocante e proyecto, pero te ainda tin falta di ambos.
